'O Paese 'e Pulicenella

  Pulicenella sapite che dice?
  Ca paese significa munno, sape sulo ca è largo e ca è tunno
  e nun tene pariente ne amice
  dice: "'O cunto purtatelo a mme..."
  Pulicenella sapite chi è? Perepè perepè perepè

  Pulicenella è padrone 'e paese
  Pulicenella fa tutte cose isso
  Pulicenella se arriva 'nu fisso ca vulesse che saccio... fa spese
  dice: "'O cunto purtatelo a mme..."
  Pulicenella sapite chi è? Perepè perepè perepè

  Pulicenella 'o sapimmo ca tene tutt'e vizi d'a rosa marina
  è pirciò ca se sceta 'a matina, vo sapè, se 'ntallea, se trattene...
  dice: "'O cunto purtatelo a mme..."
  Pulicenella sapite chi è? Perepè perepè perepè

  Pulicenella addereto 'o spurtiello 'e 'll'ufficio domanda e risposta
  te risponne: "Ma caro te costa... Ca pe cchesto, pe cchesto e pe
  chello..."
  dice: "'O cunto purtatelo a mme..."
  Pulicenella sapite chi è? Perepè perepè perepè

  Pulicenella sta sempe stunato, puveriello, nun sape e nun sente
  ma si appura ca povera gente s'a mettuto 'o soldo astipato
  dice: "'O cunto purtatelo a mme..."
  Pulicenella sapite chi è? Perepè perepè perepè

  Pulicenella nun tene giudizio, nun ce pensa ca 'o tram è scassato
  se 'o biglietto l'avite pavato... bene o male v'a fatto 'o servizio...
  dice: "'O cunto purtatelo a mme..."
  Pulicenella sapite chi è? Perepè perepè perepè

  Pulicenella ha signato, ha guardato, dint'o vico di tale, di tale...
  s'adda fa nu lavoro stradale s'adda fa... ma però s'è fermato...
  dice: "'O cunto purtatelo a mme..."
  Pulicenella sapite chi è? Perepè perepè perepè

  Pulicenella te dice: "Firmate questa causa l'abbiamo vinciuta..."
  sì sicuro che già l'he perduta... e cu tutto ca ha avuto 'e mazzate
  dice: "'O cunto purtatelo a mme..."
  Pulicenella sapite chi è? Perepè perepè perepè

  Pulicenella le piaceno 'e ccarte, specialmente si songo signate...
  chelle 'bbone se ttene stipate, 'e suggette t'e mmette dint 'e scarte...
  dice: "'O cunto purtatelo a mme..."
  Pulicenella sapite chi è? Perepè perepè perepè

  Pulicenella è spassuso, se spassa quanno porta 'e cartelle arretrate,
  sono imposte d'uscita e d'entrata, però isso nun pava 'na tassa...
  dice: "'O cunto purtatelo a mme..."
  Pulicenella sapite chi è? Perepè perepè perepè

  Pulicenella fa mille mestiere, 'o barbiere, 'o stagnaro, 'o pittore,
  ll'architetto,
  'o 'ngignere, 'o dottore, sape 'o munno e dimane e d'ajere...
  dice: "'O cunto purtatelo a mme..."
  Pulicenella sapite chi è? Perepè perepè perepè

  Pulicenella fa pure 'o scrittore, e s'abbacca cu chisto e cu chillo...
  tene 'a penna e 'nu core tantillo... e si joca 'a parola d'onore
  dice: "'O cunto purtatelo a mme..."
  Pulicenella sapite chi è? Perepè perepè perepè

  Pulicenella è padrone 'e paese, sape vita, miracoli e morte
  pe 'pprtose, pe 'ssenghe, pe 'pporte mette recchia... e se squaglia
  all'inglese...
  dice: "'O cunto purtatelo a mme..."
  Pulicenella sapite chi è? Perepè perepè perepè

  Pulicenella se mena da 'o lietto, quanno trase 'o vapore dinto 'o puorto,
  e nun have nè colpa nè tuorto quanno afferra 'o straniero pe pietto
  dice: "'O cunto purtatelo a mme..."
  Pulicenella sapite chi è? Perepè perepè perepè

Lacreme napulitane

Mia cara madre,
sta pe’ trasí Natale,
e a stá luntano cchiù mme sape amaro....
Comme vurría allummá duje o tre biangale...
comme vurría sentí nu zampugnaro!...

A ’e ninne mieje facitele ’o presebbio
e a tavula mettite ’o piatto mio...
facite, quann’è ’a sera d’’a Vigilia,
comme si ’mmiez ’a vuje stesse pur’io...

E ’nce ne costa lacreme st’America
a nuje Napulitane!...
Pe’ nuje ca ce chiagnimmo ’o cielo ’e Napule,
comm'è amaro stu ppane!

Mia cara madre,
che so’, che so’ ’e denare?
Pe’ chi se chiagne ’a Patria, nun so’ niente!
Mo tengo quacche dollaro, e mme pare
ca nun so’ stato maje tanto pezzente!

Mme sonno tutt’ ’e nnotte ’a casa mia
e d’ ’e ccriature meje ne sento ’a voce...
ma a vuje ve sonno comm’a na "Maria"...
cu ’e spade ’mpietto, ’nnanz’ ’o figlio ’ncroce!

E nce ne costa lacreme st’America
e nuie napulitane…
Pe’ nuie ca nce chiagnimmo ’o cielo ’e Napule
Comm’ è amaro stu ppane!

Mm’avite scritto
ch’Assuntulella chiamma
chi ll’ha lassata e sta luntana ancora...
Che v’aggia dí? Si ’e figlie vònno ’a mamma,
facítela turná chella “signora”.

Io no, nun torno...mme ne resto fore
e resto a faticá pe’ tuttuquante.
I’, ch’aggio perzo patria, casa e onore,
i’ so’ carne ’e maciello: So’ emigrante!

E nce ne costa lacreme st’America
e nuie napulitane…
Pe’ nuie ca nce chiagnimmo ’o cielo ’e Napule
Comm’è amaro stu ppane!

Senza sole

Dint’a nu vecariello senza sole
J’ sentivo ’e cantà matina e ssera;
erano belle musica e parole;
e ’a voce era cchiù fresca ’e Primavera.

Penzaie: “Forse è ’a cchiù bella ’e sti figliole
Chella che canta spensierata e allera,
e tene ll’uocchie ca so’ doie viole
ca danno luce a ’na faccela e cèra.”

E le mannaie ’na lettera d’ammore
- ’na lettera ’a cchiù ardente e ’a cchiù
sincera
a ’stu bello canario cantatore.

Ma avette pe’ risposta  sta mmasciata;
“ Chella che canta d’ ’a matina a’ sera
 e tene  ‘a voce d’oro, è ’na cecata.”

Speranza ‘e Natale

  ‘O mmale ‘e nu munno ‘mpazzuto
me trase ‘int’’o core stasera

nu core ca cerca n’aiuto,

l'aiuto 'e na mano sincera…

Pe’ ll’aria nu suono ‘e zampogna

me porta ‘a nuvena ch’è doce

ma è spina ca ‘mpietto me pogna

sentenno pesante sta Croce.

Sole ‘e Natale puortece

‘o pizzo a rrisa ‘e Ddio

cu’’o verde  d’’a speranza

pace e serenità

dacce dint’’a sti juorne

carezze d’alba, ‘e cielo,

scacciala 'a nuje pe' sempe

tutta sta ‘nfamità!

'O PRIMMO 'E SETTEMBRE

Ll' urdemo suonno d'Austo
se sceta c''o primmo 'e Settembre,
stasera è n'incanto!
'O cielo è amaranto, na rèfola 'e viento
doce comme 'a carezza 'e nu bbene
amara comm 'o ffele d''o chianto
me porta
na chiorma 'e penziere
ch'affollano 'a mente
e metteno ncroce stu core.
Vurria ca chiuvesse e nun chiove...
vurria tanta nuvole attuorno
ma 'a luna è d'argiento...
Vurria ca nu suonno turnasse
ma 'o suonno nun torna.
Stu suonno è partuto
'ncopp''a ll'onne
'e ll'urdema sera d'Austo
lassannome
nu grappolo 'e stelle
miez''a nu cielo amaranto
'int''a sta sera 'ncantata
d''o primmo 'e Settembre.

...E guardo 'o mare

...E guardo 'o mare

ma chesta sera l'onne

songhe 'o ritratto

'e sti penziere mieje

veneno e vanno

comme 'e ricorde

ca se perdono

là

addò l'acqua se vasa c''o cielo.

'A terrazza è deserta

nun me voglio affaccià

nun è 'o mumento

e pò pe' fa che cosa

ma pecchè?

meglio a fa finta 'e niente.

...E guardo 'o mare

'nnanze all'uocchie

'a tristezza

'e na pioggia d'autunno.

A TOTO’

Tu ‘ncopp’’o palcoscenico

si’ stato n’attrazione,

‘o rre d’’o munno comico

pe’ tre generazione.

Verace figlie ‘e Napule

n’he dato buonumore,

sapive fa miracule

cu’ l’arte toia d’attore.

Madò, che Ddio ‘e cervella

tenive comme autore

pe’ scrivere : ‘A LIVELLA

e ‘O FINE DICITORE.

Pe’ fa na MALAFEMMENA

ch’è nu capolavoro,

canzona chiena ‘e sémmena

ch’ogge se canta ancora.

A sta città che campa

‘a sempe ‘int’’o turmiento

tu c’he lassate ‘a lampa,

nu sciummo ‘e sentimento.

N’eredità ‘e surriso

nu testamento ‘e core

na luce ‘e pizzo a rrisa

l’oro ‘e nu ‘nduratore.

E pe ringraziamento

t’avimmo dedicato,

TOTO’, nu monumento

tutto pe tte, allustrato!

Napule è na famiglia

aunita ‘int’’o calore

e tu ca lle si’ figlio

nun può murì, nun muore!

Ammore d'estate

Testo di Luciano Somma – Musica di Taddeo Scalici
Austo , ‘nterr’’a rena tutt’’e dduje
Guardammo comme ‘o sole se ne va
E chianu chiano accumparisce ‘a luna
Ch’all’intrasatto ‘o bbene fa sunnà …
 
Cu’’e mmane dint’’e mmane , vocca a vvocca ,
assapurammo sta felicità
e correno sti core forte ‘mpietto
e nuje nun ce stancammo e ce vasà .
 
‘O mare ci’accarezza e ‘ncielo ‘e stelle
pare ca se mettessero a ballà
na voce canta e na chitarra sona…
e intanto io mo accummencio già a penzà:
 
ca tu dimane parte , te ne vaje ,
luntano a me, dint’a n’ata città
chisà si quacchevota penzarraje…
ma ‘o tiempo tutt’’e ccose fa scurdà .
 
Austo chesto fa : scummoglie  AMMORE
Ca po’ Settembre vene a cummiglià;
‘e na passione doce ‘e na  stagione
forze manco ‘ o ricordo restarrà .
 
DAL CD AMMORE PE' NAPULE
Canta TADDEO
 
Surgiente

Aria 'e mare

Se so’ stutate ‘e luce ‘int’’a nuttata
Povere ‘e luna ‘ncopp’a sta città
‘o viento nun asciutta sti paure
e l’aria ‘e mare trase ‘int’’e pulmune
zitte, stanno durmenno sti ccriature.
Chest’aria ‘e mare
Ma comme sape ‘e chianto st’aria ‘e mare
Na vranca ‘e fronne gialle ‘int’’e penziere
Cu na speranza appesa a na scugliera.
P’’e viche cchiù nun sonano ‘e chitarre
Se so’ addurmute ‘e ddete ‘ncopp’e corde
So’ nuvole luntane sti ricorde
So’ ragge ’e luna stise ‘nterra ‘a rena.
Chest’aria ‘e mare
Profuma ‘e suonno antico st’aria e’ mare
Fantasma arruzzunuto dint’’a varca
Ca chianu chiano se ne va luntana
Lenta scumpare macchia all’orizzonte
E resta ‘o mare… solamente ‘o mare…

Surgiente

BASTA CU’’E SUONNE !

   Tu staje durmenno ‘a troppo tiempo ormaje

‘mbraccia’’e ccanzone , ‘o sole , ‘a luna , ‘o mare ,

mentre tenimmo na muntagna ‘e guaje

assapuranno ‘e llacreme cchiù amare .

 

No , nun se pò campà na “ sceneggiata “

C’’o popolo ch’è sempe ‘o primmo attore

Cu’ na ferita antica maje sanata

E tante e quante spine dint’’o core .

 

Giesù Cristo scennette ‘ncopp’’a terra

Fui mise ‘ncroce ma resuscitaje

chesta città sta sempe miez’’a guerra

senza truvà nu poco ‘e pace , MAIE !

 

‘Ncopp’’e disgrazie stanno speculanno

arricamanno ciente e cchiù busche

stammo dint’’a ‘mmunnezza ma nun sanno

‘o sudore che scorre miez’’a via…

 

‘O sanghe ca se jetta pe’ dà ‘o ppane

a tanta vocche a stommaco vacante

campanno cu’’a speranza ‘e nu Dimane…

suffrenno ‘int’’o silenzio comm’’e sante .

 

Basta però chisto è ‘o mumento , ll’ora

Tu staje durmenno ‘a troppo tiempo e ‘o ssaje

È overo ca vulisse durmì ancora

Ma è fore tiempo ‘o suonno ca te faje.

 

Chitarre , manduline ,serenate ,

so’ solamente na scenografia

sulo ricorde ‘e juorne ormaje passate,

NAPULE , nun se campa ‘e fantasia!

 

Levate ‘a cuollo ‘e panne d’’a reggina

E miettete cu’’a capa e c’’o pensiero

A straccià tutte quante ‘e ccartuline

Ca nun so’ cchiù ‚o ritratto tuoje sincero .

 

E arapele chist’uocchie finalmente

Facimmelo stà zitto chistu munno

E faticammo dignitosamente

Pecchè è fernuta l’epoca d’’e suonne .

CANE E CRIATURE

Chisà chi te l’ha dato ‘sta pacienza

eppure tutt’’e juorne ‘e vaje cercanno

pecchè tu ‘o ssaje so’ aneme ‘nnucente

pirciò suppuorte chello ca te fanno.

 

Tu si cusciente ca songo creature

e penzarraje: facimmencelle fa

te tiene na carocchia, t’abbandune

e te staje quieto senza risciatà.

 

‘E guarde ‘nfunno all’uocchie, ‘e tiene mente

cercanno d’’e capì d’’e fa pazzià

e quanta vote po’ ‘mpruvvisamente

e zumpe ‘ncuollo p’’a felicità.

 

Cu lloro cchiù ‘e nu cane tu si’ ‘o pate

e guaje a chi s’azzardasse d’’e tuccà

avesse ‘a te ‘a cchiù grossa muzzecata

tu ce appezzasse ‘a vita p’’e salvà.

 

E io ‘e vvote penzo ca si’ chisto è ‘o munno

se so’ sbagliate a te chiammà: animale

‘a vera  bestia è sulamente l’ommo

tu no – nun saje nemmanco che d’è ‘o mmale.

 

‘O mmale stà int’’a ll’anema d’’a ggente

ch’arrobba e accide senza ave’ pietà

va na cullana ‘e lacrime spannenno

senza curarse ‘e tanta ‘nfamità.

CHE RESTA?

Sulo nu sguardo friddo, indifferente,

dato p’’o da’, accussì, p’educazione,

aiere èvemo tutto, ogge cchiù niente:

comme è busciarda, ‘e vvote, na passione.

Che lamiento picciuso è ‘stu rosario

senz’albe nove, che malincunia,

na scena muta e po’ cala ‘o sipario

cummiglianno finanche ‘a nustalgia.

Addio carezze ‘e bbene avvellutato

chiene ‘e speranza che devano aiuto!

‘O tiempo a tutt’’e dduie ci’ha trasformato:

che resta ‘e chill’ammore? Nu saluto…

Dimane

Nu cielo chiaro,
comme a nu specchio,
lucente , brillante !
Nu sole cucente
'nfoca
tutt''e ccose attuorno .
Ma chiove…si, chiove
Dint''e core d''a ggente
Che CHIAGNE.
So' ciente , millanne
Che CHIAGNE
E nisciuno ,si , proprio nisicuno
Fa niente pe' niente…
Eppure sta NAPULE
Ha dato a stu munno
Nun solo canzone
Ma tutta na storia
Ch''a lettere 'e fuoco
Stà scritta
'int''o libbro d''a vita .
'O cielo è sereno,
'o sole è n'incanto
ma chiove…si,chiove
'int''e core d''a ggente
che campa dicenno
'a millanne : …
Ma quanno s'addorme
Nun sonna
E quanno se sceta 'a matina
Nun trova
Ca 'o stesso d'ajere .
Eppure dimane
Sarrà comm'a sempe :
nu sole cucente
ma chiove…si,chiove
'int''e core d''a ggente !

 
                                 LUCIANO SOMMA

 
Da DIMANE
Prefazione di SALVATORE CERINO
Ed.Degli artisti- Napoli 1977

 

Surgiente

È GIA’ SERA

‘Int’’o mare d’’o munno ferito

quanta stelle cadute,

e ll’onne ‘mpazzute

se portano a rriva

l’arraggia d’’o viento,

pe’ copp’’a scogliera

se cerca na luce

ca desse nu filo ‘e speranza,

ma s’è fatto tarde, è già sera…

È sera pe’ ll’aria, malata,

addò pure ‘o respiro

s’ammesca cu’’e nnote cchiù amare

‘e na musica antica

che porta ‘o mutivo viulento

d’’a sete ‘e putere.

Nu scunciglio ‘e gabbiano

attuorno

tortura na povera vela

ca tremma e se perde

cadenno pe’ copp’’a scugliera,

nisciuno cchiù ‘a salva

pecch’è troppo tarde, è già sera…

È sera pe’ chi va truvanno

nu pizzo stramano

supplicanno na vita serena

ma cchiù nun trova na mano…

È sera pe’ chi ‘e ll’onestà

ha purtato ‘a bannera

sfrasturnato ‘a ‘stu globbe ca gira

‘o cuntrario d’aiere,

e more n’altare ‘e speranza

mentre n’organo sona

‘o trionfo d’’o mmale,

cchiù forte, ogne ghiuorno, cchiù forte

marturianno ‘a tastiera.

‘Int’’o mare d’’o munno ferito

s’è fatto tarde, è già sera…

E’ NATALE!

‘O palpito ‘e mille campane

che sonano p’’a mezzanotte

‘a gioia che da’ st’ammuina

anticipa nu quarantotto.

 

Aunite, c’’o sciato ‘e ll’affetto,

ce sta’ tutta quanta ‘a famiglia

è doce a campà stu mumento

ch’astregna sti core, atturciglia.

 

Miraculo ‘e n’attimo ‘e pace

na sosta pe’ l’anzia e l’affanno

pe’ nuje, ca pasture ‘e presebbio,

avimmo campato nat’anno.

 

Vurria ca stu tempo nemico

Putesse fermà sti minute,

sti facce, sti vvocche, sti mmane,

na voce ch’allucca: Salute!

 

Chist’uocchie che guardano ‘a cimma

‘e n’albero addò l’abbundanza

sta dint’’e ggranate d’’e lluce

ch’appicciano ‘o ffuoco ‘e st’ausanza.

 

Chist’uocchie ca cercano ‘o bbene

tra mille culure ‘e biancale

stunate e ‘mbriacate p’’o vino

mo so’ lampe ‘e vita, è Natale!

Facenno 'ammore...

Doppo chello ca c'è stato
Senza manco nu saluto
Bene mio tu m'he lassato
Accussì senza penzà
Ca m'he dato nu dulore
E stu core inutilmente
Ha cercato pe' tramente
Sulamente 'e te scurdà

E mo saccio pecchè
Io quanno faccio 'ammore
Annanze all'uocchie
veco sulo a tte!
A tte ca staje luntana
E che sento vicino
Ch'arteteca, e na smania
ca nun me vo' lassà ,
te chiammo ogne mumento
me sierve pe' campà .

Ch'aggia fa tutto è fernuto
'nzieme 'o tiempo
ch'è passato
Dint''e vvene si' restata
Me faje chiagnere e dannà
Tu staje dint'a tutt''e suonne
Dint'all'aria ca respiro
Chesta vita se ne fuje
Addò staje felicità ?

FRIDDO

  'O friddo, stu friddo,

che sento 'int''e vvene

che gela sti ccarne

che tremma 'int''o core

me porta l'affanno

d''o mmale d''o munno

cchiù funno d''o funno

cchiù amaro d''o chianto.

Nu poco 'e calore

purtarria 'o sereno

na smania d'ammore

ca invece nun vene

...e 'o friddo me pogna

cchiù acuto 'e na freva

stu ghiaccio è tagliente

che trase e cammina.

'O sanghe malato,

'o ppane stentato,

na mano ch'accide,

na voce 'e dannate.

Stu friddo è pussente,

me pare n'inferno

sta vita ca è niente,

però nun è vierno!

GRAZIE

Pure ‘o cardillo nun tene cchiù voce…
Io guardo ‘e rame sicche , scunzulato ,
‘o Crucefisso ‘e sta vernata  ‘ nCroce ,
‘o cielo ‘e chiummo pare nu malato .
 
Vicino a nu telefono ch’è muto
Comme so’ lente l’ore d’’a ghiurnata
‘a stanza pare fosse nu tavuto
pure ‘a televisione àggio stutato .
 
Mo ‘nfaccia ‘e lastre ‘o viento se lamenta
comme ‘o chianto picciuso ‘e na criatura
e stu penziero ‘e te che me turmenta
‘a luntananza , ‘o ssaje , mme fa paura .
 
‘Mpruvvisamente ‘o lampo ‘e na tempesta
pe’ n’attimo fa chiara ‘a stanza scura ,
sbatteno tutt’’e pporte d’’e ffeneste ,
tremmano tutt’’e quadre ‘nfaccia ‘e mmura .
 
All’intrasatta sona ‘o campanello
Vaco arapì e te veco ‘nnanze all’uocchie
‘nfosa p’’a pioggia , stanca , piccerella ,
sento nu tremmulio dint’’e ddenocchie .
 
Doce accussì nun t’àggio vista maje
Ma nun parlà , dicisse na buscia…
Addò si stata nun me ‘mporta e ‘o ssaje
grazie ca si’ turnata , figlia mia .

GUARDANNO N’ALBERO ‘E NATALE

Vinte ‘e Dicembre

dint’’a casa mia

sto sprufunnato ‘ncopp’a na pultrona,

vicino a mme muglierema che stira,

lasso pe’ nu mumento stu giurnale

pe’ tenè mente

l’albero ‘e Natale.

Guardanno ‘e ppalluccelle culurate

s’appiccia ‘int’’e penziere

n’arcubaleno ‘e ggioia

facendo chesta mente sfrennesià.

Torna

nu desiderio ‘e bbene luntano,

quase scurdato,

‘e panne a stirà so’ fernute…

Muglierema s’assetta ‘nzino a mme!

Che gulio che m’afferra

che sapore

st’abbraccio mo tene ‘o calore

d’’o ffuoco ‘e biancale

na carezza, nu vaso

ardente e carnale

finalmente quaccosa ‘e sta vita

pe’ n’attimo vale.

Quanto me piace st’albero ‘e Natale…

IO ME DISPERARRIA

Io me disperarria
si guardanno ‘int’’o specchio ‘e ll’uocchie tuoje
vedesse l’ombra ‘e n’ato e arrassusia
iesse ‘int’a cchiesia, comme a nu pezzente,
senza sentì, preganno, ‘a voce ‘e Dio.
 
Io me disperarria
si avesse purtà ‘a croce d’’a vicchiaja
sulo senza ‘o calore ‘e na carezza
sulo ‘int’’o ggelo ‘mbraccia a na tristezza
ch’arrubbarria sta vita ‘a dint’’e mmane.
 
Io me disperarria
si all’intrasatta s’asseccasse ‘o mare
si doppo ‘a notte nun spuntasse l’alba
si nun sentesse cchiù dint’a stu core
‘e palpite d’’o bbene ‘e mamma mia.
Tanno, e sultanto tanno, io overamente
nun disperanno cchiù ne murarria.

L'HE VISTO MAJE?

Nu mare traggico
'ncrespato d'onne
e a riva, 'nterra 'a rena,
na rezza che chiagne
lacreme 'e solitudine:
L'he visto maje?
Na notte senza luna
e, arravugliato e nniro,
senza respiro 'o cielo
cu''e stelle annascunnute,
comme a tanta criature,
sott''o mantesino d''e nuvole;
L'he visto maje?
N'albero guagliunciello
cu'' fronne ancora verde
ca 'o viento fa spezzà
senza pietà, accussì, 'mpruvvisamente,
l'he visto maje?
N'auciello appecundrute
ca cerca 'o nido
comme n'ommo cerca 'o ppane
e tutto appaurato
cercanno prutezione
se chiagne na frunnella e na cajola;
l'he visto maje?
Si tutte chesti ccose, ammore mio,
tu 'ncopp'a strada toja
nun l'he truvate ancora,
si overamente nun l'he viste maje
nun 'e ccercà
basta che guarde 'nfunno a chistu core
e a' una a' una
certo 'e pò truvà.

LASSATE STA’

Si penzate ca ‘e solde sulamente

Ve ponno da’ salute , gioia e ricchezza ,

lassate stà , nun ‘mporta , nun fa niente ,

nun leggite stu libbro , è na schifezza .

 

Facitelo restà dint’’a vetrina

Passate annanze , nun ve ne curate ,

nun è ‘a ricetta pe’ na medicina ,

pirciò , sentite a mme , nun l’accattate !

LL’APPUNTAMENTO

Me sento ricco , e nun tenco na lira ;
me sento Re senza tenè na corte ;
ma ‘o patremmonio e ‘o regno è chesta Napule
ca ‘a vonno fa murì , ma nun è morta !
 
Napule è sempe chella…tale e quale:
cu’’o mare generoso , chin’’e core ,
ch’è ancora ‘a vita pe’ nu piscatore ,
ch’è tutt’’o munno pe’ nu puveriello .
 
E vaco a Margellina tutt’’e ssere ,
ncopp’’a scogliera : ’o posto è prenotato !
pe’ vedè ‘o spettaculo ‘e sti lluce ,
e quanta cose ca stu core sente …
 
Nu poco ‘e chesta musica ca ‘o mare
Mme porta tutt’’e ssere , puntualmente ,
sona pe’ mme , o almeno accussì pare :
quanta felicità ‘st’appuntamento !

LL’URDEMO ‘E LL’ANNO

Migliar’’e botte ‘ntronano p’’e viche,

sciumm’’e spumante corrono p’’e ccase.

È mezzanotte, e l’anno ch’è fernuto

c’’o cchiù bello surriso ce saluta.

Chioveno da’ e balcune e da’ e ffeneste

butteglie, fiasche, ‘nzalatiere rotte,

piatte sengate e vase ‘e terracotta

fanno ‘nzerrà d’’e vasce tutt’’e porte!

Chi se scagne ‘n’abbraccio e chi nu vaso

tutte felice, vecchie e guagliuncielle,

tutte so ricche, pur’’e puverielle

o munno, pe’ n’istante, s’’e cagnato.

Ma comm’a nu cardillo senza voce,

dint’a chist’angulillo senza luce,

ce stà nu core ca nun trova pace

‘nzerrato ‘mpietto, stracquo ‘e tutt’’e ccose.

Comm’a nu cane senza cchiù padrone

comm’a ‘n’albero senza cchiù ‘na fronna

io stongo sulo, mentre se struje lenta

‘a fiamma ‘e ‘na cannela c’allummaje.

Cu’ nu bicchiere ‘mmano ch’è vacante

voglio fa quacche brinneso sultanto:

nu brinneso a chi tutto s’ha pigliato

e niente ha dato.

Nu brinneso a’ salute ‘e chi ha lassato

‘o core mio pe’  ‘n’ato!…

Luntana 'a me

I
Pure l'aria, ammore, parla 'e te,
e dint''o core cride staje sbattenno sola tu
M'he lassato chesta solitudine
ca fa dannà
io t''o giuro nun ci''a faccio cchiù
me sceto tutt''e notte e dint''o scuro veco a tte
quase comme fusse n'incantesimo
sempe tu
ca t'he pigliato 'a vita mia
ca nun conta niente senza 'e te!

Tu luntana 'a me
Te staje fidanno 'e sta, sembra incredibile!
M'he lassato nu dulore e mille spasime
Ca nisciuno a chistu munno po' sanà
Luntana 'a me
Tu luntana 'a me
rieste sempe nu ricordo incancellabile
E i' campanno sto murenno senza 'e te!

II
Io mo sto spianno ma pecchè
me sta criscenno 'a smania
e sta passione 'mpietto a mme
Comme so' cucente chesti lacrime
ca scenneno
Si 'a tristezza ca nun vo' fernì
Si 'a sola stella dint''o cielo ca nun brilla cchiù
nu ricordo doce ca fa chiagnere
Sempe tu
Ca m'he stracciato na poesia
Ca se sta perdenno 'nzieme a tte!

L’URDEMA LUCE

Addò stà chillu profumo d’ammore

mò ca svestita ‘e speranza

sempe bella ma pallida e stanca

me guarde e me tremmano ‘e mmane?

Ancora te prego, nun vide?

Ancora te supplico, siente?

Ma allora nun vale cchiù niente

sta fede che porto pe’ tte.

E a tte cerco ll’urdema luce

ca rischiarasse stu’ core

ma nun te n’adduone ca io moro

iuorno pe’ ghiuorno accussì.

Senza ‘a carezza ‘e na mano

ca me facesse coraggio

pe’ suppurtà nu calvario

ch’è troppo grande pe’ mme.

E allucco, chiammo, iastemmo,

cu’ tutt’’a forza ‘e ll’affanno

ma dimme pe’ quanto, ma quanno

stu cuorpo po’ ancora aspettà.

E dint’a sta chiesia vacante

tu bella ma pallida e stanca

me guarde e io te prego, nun vide?

Ancora te supplico, siente?

MUSICA NOVA

Na fronna verde,

cchiù verde d’’o verde,

p’’o sciuscio ‘e nu viento maligno

sta cadenno

spezzata,

po’ n’ata

e n’ata ancora,

e nisciuno ca dice a stu viento:

mo fèrmate, basta!

Ogni ghiuorno che passa

È cchiù vecchio, cchiù stanco;

tene ‘a voce abbrucata e ‘o lamiento

è cchiù lento;

ogni passo è pesante

pe’ tramente ‘int’a llaria

‘o suspiro è turmiento.

Chistu tempo ch’è amico e nemico

Cammina p’’o munno

Cu’ rilorge ‘mpazzute

Lancette cagnate…

Ma pe’ vvie ‘e ll’Universo se sente

na musica nova che Dio

sta sunanno pe’ l’ommo ‘e dimane

ca nun è certamente Gesù…

NUN SIA MAIE

Si asciuta dint’a nu capriccio ‘e sole

scetata cu’’o profumo ‘e n’alba chiara

so’ palummelle doce sti parole

che staje dicenno-comme mme si cara!

L’uocchie so’ specchio ‘e perle ‘mmiez’’o mare

‘a vocca toja carnosa è na cerasa

e l’oro d’’e capille mo me pare

na ricchezza ca regna ‘int’a sta casa.

Addò campammo nuje che a bbona ‘e Dio

ancora ce vulimmo tantu bbene

è nu gemello ‘o core tuojo cu’’o mio

che sbatte forte e fa tremmà sti vvene.

Una cosa però t’arraccumanno,

e so’ sicuro nun m’’a negarraje,

quanno facimmo amore, e sulo tanno,

nun di’ ca te sfastidie, nun sia maje!

ONESTA’

Si ricco, è overo, ma si’ pretenziuso,
e guarde ‘a ggente comme si ‘a schifasse
staje carreco ‘e denare, te n’abuse,
e vaje facendo ‘a mangiatòra vascia…
 
Te si’ accattata ‘a villa a rriva ‘e mare
na machina veloce, n’aeroplàno,
e te mantiene ‘a meglia d’’e “cummare”
ca te fa arrecrià nuttate sane…
 
Tu te ne vide bbene, chesto è giusto,
campanno ‘a vita toja meglio d’’a mia
‘e chistu munno n’assapure ‘o gusto
mentr’io m’’a sonno ‘a scrivere poesia…
 
Ma ‘o fatto ca faje troppo ‘o superbiuso
credennete, chisà nu pataterno
me fa penzà ca te scuorde na cosa:
‘a vita è nu passaggio sulamente…
 
E’ nu suonno ‘e na notte sultanto
si ammesurammo tiempo, eternità…
pirciò tutt’’a superbia e tutt’’o vanto
se ‘nchiova ‘nnanze a Dio, all’immensità.
 
E quanno ‘a nase ‘e cane vene a leggere
vicino a porta toja pe’ te chiammà
tu può cercà cu’’e solde d’’a “corrompere”
ma ‘a morte è ONESTA, nun se po’ accattà!

Pasca

Gesù

ogn'anno nasce e muore

po' te ne saglie 'ncielo e statte bbuono!

Ma 'e cchiesie so' vacante...

'Naffaccia 'e mmura

c''o sanghe d''a ggente

ce sta scritto cu' l'odio e 'o disprezzo

'a storia 'e stu munno ca 'nfunno

nun tene cchiù niente.

Ma qua resurrezione

si ci'avutammo attuorno

e nun vedimmo ca miseria e mmorte!

'A vita è nu passaggio

ma cu' quale curaggio

nuie passammo pe' chesta via 'nfame,

addo pure 'a preghiera è na jastemma!

E miez''o cielo

pure l'aucielle sentono dulore,

'e rrose nun so' rrose sulo spine,

'e sciure cchiù nun teneno prufumo,

l'ammore è sulamente na parola

ca se dice cu''a freva 'e doje vocche

quanno 'o cuorpo s'astregne cu' n'ato,

na cummedia, na scena,

ca fernesce a sipario acalato.

'A fede m'ha lassato,

nun credo cchiù a nisciuno,

'a puisia è luntana 'a chistu core,

so' addiventato juorno pe' ghiuorno,

'nzieme cu' ll'ate, pur'io nu peccatore.

E nun voglio penzà

ca tutte chesti ccose malamente

so' frutte d''o peccato origginale,

pecchè si accussì fosse allora Ddio

si tale e quale a nuie, ca nun perduone,

e addò sta cchiù

chill'essere perfetto,

ch'è giusto, superiore, ch'è divino.

Qualunque tuorto nuie t'avimmo fatto

è troppo gruosso 'o prezzo ca pavammo

e nun ce può lassà

comme a na mamma, snaturata e 'nfame,

c'abbandona nu figlio miez''a via,

facennole mancà calore e ppane...

Voglio penzà ca esiste, tu si Ddio?

Chisto  mumento ca l'he dimustrà

o ce distrugge anite tutte quante

oppure l'he a salvà 'st'umanità.

PISCATORE

‘A luce ‘e na lampara

miez’’o mare

culora ‘argiento l’onne

schiara ‘a prora

‘o piscatore tira ‘a rezza

e pare

ca sta natura canta e se cunzola .

 

Nuttata doce ca se porta

 ‘nzino

tutto l’affanno ‘e na jurnata

amara…

ne voce , n’ata voce , n’ata ancora ,

tira Tatò , ca sta venendo ,

tira!

‘A vita . chesta vita ,

‘e vvote avara ,

‘e vvote ricca , ‘e vvote senza core ,

regala chesto

pe’ se purtà fore

‘o carreco

‘e nu tummolo ‘e penziere .

 

Na nuvola scumpare , po’ accampare ,

‘a copp’’o cielo

cchiù abbuffata

e nera

po’ chiove e ‘o viento

se lamenta e cade

‘a pioggia ,

tutte lacreme d’’o cielo…

 

‘A luce ‘e na lampara

miez’’o mare

se stuta  e ‘a varca

lenta torna a rriva

addò l’aspetta

‘o solito via vaie ,

mugliera , figlie ,

rezze ‘nfose , guaie…

P’AVE’ NU FILO ‘E LUCE

Nun s’assapora

‘a gioia

senza chianto;

chisto è ‘o destino

‘e ‘na criatura ‘e Ddio.

‘O chianto, ‘a vvote,

‘e na liberazione

doppo te siente meglio.

Pecchè, pecchè dich’io

P’avè ‘nu filo ‘e luce

Avimmo sempe pavà

Na vita d’ombra?

SCUSAME

Tu nun me guarde cchiù comme a na vota

e chesto è naturale

‘o tempo primma appanna e po’ cancella

amore, affetto, desiderio e bbene.

Tant’anne ‘nzieme

tra gioia, dolore, affanne, anzie, turmiento,

è comme nun l’avessemo campate

è comme si nun fossero mai nate!

Mo ca nun te so’ cchiù nemmanco frato

me vide comme fosse nu peccato

che staje scuntanno stanca e rassignata,

‘o core ‘mpietto a tte s’è congelato.

Chi ‘o po’ scarfà? So’ certamente ‘e figlie

o l’ombra ‘e n’ato ca mpruvvisamente

‘a nu suonno luntano, o ‘e stu mumento,

te gira attuorno, te fa luce, abbaglia.

O forze no, songh’io ca sto vedendo

cu’ l’uocchie stanche ‘e n’anema agitata

sultanto ‘o mmale ca me porta ‘nfunno

int’’o mare e  sta vita scunzulata.

Tu nun me guarde cchiù comme a na vota

pur’io però me songo trasfurmato

strigneme ‘a mano, dammece st’aiuto,

scusame, amore, si me so’ sfugato…

SERENITA’

Astregnere ‘int’’e mmane

‘a mana ‘e chi vuò bbene,

truvà int’’o funno ‘e ll’uocchie

‘e na criatura

chella ‘nnucenza ca nun tiene cchiù.

Guardà nu mare placido

int’a na sera ‘austo

sentì ‘o suspiro ‘e ll’anema

ca se cunfonne

c’’o respiro ‘e ll’onne.

Arretirarse ‘a sera

e vedè attuorno ‘a tavula

tutt’’a famiglia aunita,

sentì nu figlio

ca te spia cunziglio

facennete capì

ca tu le sierve,

tu le sierve ancora…

SULE

Dicembre.

Dint’a sta casa,

atturniate all’albere ‘e castagne,

vicino ‘o ffuoco lento ‘e nu camino

d’’a ‘e lastre d’’a fenesta

veco ‘a montagna ‘e me vene ‘a penzà…

Me pare nu presebbio stu paese

addò  ‘o silenzio è amico

luntane d’’o frastuono d’’a città.

Fra mezz’ora è Natale,

io pare San Giuseppe e tu Maria,

simme rimaste sule,

‘e figlie stanno nzieme ‘e nnammurate

ncopp’’a neve a scià.

Io e tte mò stammo n’ata vota sule…

Te guardo e veco ll’uocchie

Nfuse ‘e chianto,

‘o core ‘e mamma è triste

pe’ chesta luntananza

e ‘o calore d’’a stanza

no, nun t’abbasta, né abbastarrà maie,

a regnere ‘o vacante

ca siente dint’all’anema.

‘A campana d’’a chiesia,

sona dudece vote: E’ mezzanotte!

Sona pure ‘o telefono: Auguri a tutt’’e dduie Mammà e Papà.

Natale ce arrevoglia

cu na coperta nova

e ‘o vaso ca me daie

tene ‘o sapore d’’a tranquillità.

Ma io sento, e so sicuro ‘e nun sbaglià,

ca è solamente nu mumento ‘e pace

t’’o vveco dint’all’uocchie,

quase comme leggesse int’’o pensiero,

ca ‘o core tuoie è luntano

miez’’a neve…

E guardo ‘o ffuoco lento d’’o camino,

nu tronco ‘e quercia ca s’è cunzumato,

‘a cennere ‘e nu foglio ‘e calannario…

Tristezza

 E'autunno!

Mmiez''o nniro-fummo 'e ll'aria

p''e vvie 'e sta città

senza cchiù verde

veco n'albero annuro

e attuorno a 'e rame sicche,

scheletrite,

na chiorma d'aucelluzze appaurate...

E' nu lamiento 'o suono, è nu rummore,

comme 'mpazzute voleno
pe' nu suspiro: ussiggeno...

N'accanimento inutile!

...e a uno a uno cadeno

'ncopp'alsfalto traditore e ummedo

d''o marciappiede sulitario e traggico.

Vedennele accussì

sponta na lacrema

'e na tristezza

ca nun se pò credere.

Vico Napulitano

VICO NAPULITANO

E’ sarracena sta strada ‘nfosa;
‘na fila ‘e vascie , nu vico chiuso,
so’ goccie ‘e chianto sti panne spase,
na stanza pare ca è nu pertuso.

Fenesta vascia , cu’ na Maria,
ca me faceva sunnà l’ammore,
t’hanno ‘nzerrata cu’ na buscia
d’’o terremoto ch’è senza core.

Chesta canzone , canzone amara,
porta ‘int’’e nnote cchiù ‘e nu dolore
quanno se perde na cosa cara
se po’ ascì pazzo , ce stà chi more!

Na mano sfila ‘int’’a sacca onesta
Na vocca strilla ‘nfaccia ‘e prumesse
È sulo ‘arraggia chello ca resta
Quanno nu popolo è cuppo ‘allesse.

Aiere ‘o vico santo nun era
Si l’attuccava te deve ‘a mano
Ce steve ‘a risa, ce steve ‘o chianto,
era nu vico Napulitano.

LUCIANO SOMMA

VOCE UNIVERSALE

Quanta facce tene ‘o munno
Janche , gialle , rosse ,  more ,
ma si scave ‘nfunno , ‘nfunno ,
unu sulo però è ‘o core ,
 
che s’affanna p’’a ricchezza
cu’ na lengua universale
regna l’uocchie d’allerezza
po’ fa male cchiù d’’o mmale !
 
E’ nu suonno ‘e nu pezzente
Senza Dio , senza nu santo ,
è ‘a carezza ‘e tanta gente
ca nun sape che d’è ‘o chianto .
 
E pruvate a ghì ‘int’’e ccase
‘e chi lassa chesta terra
strille , allucche ,quacche vase ,
e po’ doppo ce stà ‘a guerra !
 
Si spiate ‘e schiattamuorte
Ve cuntassero romanze
Quanta storie , quanta tuorte ,
senza maje tenè crianze .
 
Quanno more nu pezzente
Pure ‘o frato , ‘o cchiù carnale ,
va neganno ca è parente ,
chi ‘o canosce st’animale ?
 
Chest’è ‘a vita ‘ncop’’o munno
è na voce universale
ca nun cagna e fino ‘e ‘nfunno
fa assale male ,cchiù d’’o mmale !

VUOTO A PERDERE

Si stammo ‘ncopp’’a terra

pe’ ce spartere

e stammo ‘mmiez’’a guerra

pe’ cumbattere

si ce simmo scurdato

che d’è ‘o credere

si sulo pe’ capriccio

avimma nascere

è venuto ‘o mumento

‘e nun ci ‘arrennere

a chesta umanità

senza cchiù scrupule

a chesta ‘nfamità

ch’affoca l’anema,

è l’ora d’’a fernì

cu’ tanta chiacchere.

È l’ora ‘e nun sprecà

cchiù tanta  lacreme

e ‘a vita nun sarrà

nu vuoto a perdere!

‘MBRACCIA A ‘O VIENTO

N’ombra cummoglie chesti strade antiche
strette e affucate n’copp’a sti quartiere
addò ‘o respiro è affanne dint’’e viche
e l’arte d’arrangiarse è nu mestiere…
 
Eppure quacche vota sponta ‘o sole
dint’’all’uocchie  ‘nnucente ‘e na creatura
“è tale e quale a ‘o pate “, so’ ‘e parole,
“Giesù ma comm’è grande sta natura”.
 
Ma è  destinato e scritto ca stu sciore
Ca è nato e criscarrà dint’a nu vascio,
nun truvarrà mai spazio ‘a parte ‘e fore
scusate : faccio d’evera  nu fascio.
 
Ma che se po’ ‘mparà miez’a na via
l’arruobbo, ‘o scippo, ‘a droga, ‘a delinquenza,
‘e vvote currarrà cu’’a fantasia
e ‘a scola ‘a stiente pigliarrà ‘a licenza.
 
Quant’è bellillo, è tale e quale ‘o pate,
mò dice ‘a ggente a chistu guagliunciello
pate che stà ‘a vintanne carcerate
p’eredità le lassa nu curtiello…
 
Sciore che schiuppe miez’a chesta gente
che nasce e more ogn’ora, ogni mumento,
tu si te può salvà ma overamente
vulanno miez’’e campe ‘mbraccia ‘o viento…

‘O MARIUOLO

Songo mariuolo, è overo, aggio arrubbato,

ma no pe’ sfizio, pe’ necessità

e comme a’ n’alluccuto so’ caduto

juorno pe’ ghiuorno ‘int’all’oscurità.

 

Da ‘o carcere so’ asciuto, so’ trasuto,

nu sacco ‘e vote chi ‘e po’ maje cuntà,

quanno aggio ditto: basta! Mo è fernuto,

so’ stato po’ costretto a’ccummincià.

 

Ce stà chi dice ca so’ delinquente,

nun costa niente ‘e vvote giudicà,

vulevo campà io pure onestamente

e aggio cercato ‘e me riabilità.

 

Ma a ogne porta ch’aggio tuzzuliato

cercanno: “me vulite a faticà?”

m’hanno chiamato pazzo o scemunuto

dicenneme: Ma vide addò he arrubbà”.

 

E allora si’ so’ nato cu’ sta sciorta,

pecchè ‘o destino nun m’’a vò cagnà,

senza penzarce faccio palla corta

sfidanno ‘a legge e pure ‘a società.

 

Io arrobbo, trase e jesco, pe’ tramente

‘o tiempo ‘e chesta vita adda passà

‘o riesto, tutt’’o riesto, ‘e ccosa ‘e niente

tanto nisciuno cchiù me po’ salvà.

 

E si po’ doppo…’Ncielo pure Ddio

decidarrà che m’adda cundannà,

che me ne ‘mporta, saccio ‘o fatto mio,

faccio ‘o mariuolo pe’ ll’eternità!

‘O PRIMMO ‘E LL’ANNO

Stu juorno nuovo

Ca ce sceta

Tene ‘o sorriso ‘e gioia

Che da’ speranza

Pe’ ll’aria tutt’attuorno

Nu prufumo d’alleria

‘o canto ‘e nu canario

ca vola verso ‘o cielo .

Napule mamma overa

E no matrigna

Dà latte a chistu figlio

Appena nato

‘o cunnulèa

s’’o vase e l’accarezza

po’ guarda l’orizzonte

e ‘ncopp’’o mare

finalmente

vede nu raggio ‘e sole

preputente .

‘O SCEMO

Teneva sempe quatto pezze ‘ncuollo;

vedènnolo faceva assaje pietà;

e ghieva murmulianno pe’ Tuledo:

“Faciteme, ve preco, ‘a carità!”

 

Quanno qualcuno ‘o deve vinte lire,

‘o scemo ne redeva, ringrazianno:

“ ‘Ite ‘a campà cient’anne, bona gente;

cient’anne, ‘a fore ‘e chiste, e cu’ salute”.

 

E quacche vota, v’’o ccunfesso i’ pure,

vedènnolo accussi maleridotto,

lle devo diece lire o ‘a sicaretta,

penzanno: “Accussi giovane… che pena!”.

 

Ma nu juorno passanno p’’a Riviera

cu’ ‘a ‘nnammurata mia, a core a core,

vedetto asci ‘a na machina straniera,

chistu scemo vestito ‘a gran signore…

 

Teneva appresso a isso na figliola,

che v’aggia dì, na vera grazia ‘e Dio,

cu nu vestito degno ‘e na reggina,

tutta truccata comm’a  na gran miss.

 

Da buon napoletano, io son curioso;

e ‘a ‘nnammurata mia, c’a o canusceva,

è cchiù curiosa ‘e me, e ntuppecànneme,

me dicette: “Lucia’, tu he visto, neh?”.

 

Allora nun penzannoce doje vote,

m’avvicenaje e lle dicette. “Siente,

scusame si voglio essere ‘ntricante;

ma dimme: nun cercave ‘a carità?!”.

 

Me guardaje stuorto, m’abbuzzaje ‘o surriso,

e rispunnette cu nu filo ‘e voce:

“Te preco, statte zitto, mo te spieco:

muglierema nun sape ‘a verità”.

 

“Scerì, si tu permette nu minuto,

i’ vaco cu’ ‘st’amico aret’’o vico;

ll’aggia fa ‘na ‘mmasciata…”. E ‘a figliulella

‘o surridette, e lle dicette: “Oui”.

 

Appena c’avutaimo ‘o vecariello,

ce fermaimo, e isso me guardaje:

“I’ nun saccio chi si’, però me saje,

e mo te voglio ‘a storia mia cuntà.

 

Crisciuto senza mamma e senza pate,

arrubbavo na mela pe’ magnà;

d’’e puortice canosco tutt’’e pprete;

e saccio pur’’e mezze pe’’mbruglià.

 

Nu juorno, dint’a ‘stu cerviello fino,

me venette ll’idea ‘e fa ll’attore:

‘o meglio palcuscenico era ‘a via!

E accussì cumminciaje a recità.

 

Facenno ‘o scemo ‘a gente, divertita,

se fermava, redeva e regalava…

Dimme na cosa: tu ch’avisse fatto?

Ve piace ‘o scemo? E i’ ‘o scemo voglio fa.

 

Ma ‘o munno gira comme gira ‘a rota.

Nu bello juorno jette pe’ cuntà

e me truvaje nu bello capitale!

E fuie ‘o mumento chilo ‘e me fermà.

 

Me cercaje na figliola, e tu ll’hè vista:

na francesella chiena ‘e qualità.

Me so’ spusato e mo campo contento,

tenenno pure quacche proprietà.

 

Nun ce sta niente ‘a fa, cumpare mio:

‘a gente nun lle piace ll’ommo onesto;

pirciò ll’unica cosa, e tu ll’hè visto,

è chello ‘e truvà ‘o mezzo pe’ fa fesso!…”.

'E palumme

Miezjuorno. Coce 'o sole,
e vuje state int'o ciardino,
sott'e fronn'e mannarine,
'mmiezz'o ianco dd'e llenzole
spase 'o sole.
E 'na chiorma 'e palummielle
vola vola attuorno a vuje,
ca lle date 'e mullechelle.
Spezzulea, po' se nne fuje,
chesta chiorma 'e palummielle.
Accussì, pe' 'sta passione ca me struje,
volano, sempe volano,
tutt'e penziere mieje attuorno a vuje!
Ma pecchè, sbattenn'e mmane,
ma pecchè vuje 'nne cacciate,
'sti palumme aggrazziate,
mentre po' lle date 'o pane
'nmiezz'e mmane?
Se ne vanno 'ncopp'o mare,
p'e marine a ddoje a ddoje,
'ncopp'e titte 'e campanare,
e po' tornano addò vuje
e se nne vanno 'ncopp'o mare.
Accussì, pe' sta passione ca me struje,
si nn'e cacciate tornano
tutt'e penziere mieje attuorno a vuje!

'O saluto

Quanno sarraggio muorto sà che critica...

nun ce venite pe furmalità.

Nun ve sfurzate pe caccià doie lacreme,

servono sulo a vvuie... pe ve sfucà!

Trattateme come s'io fosse vivo,

parlate male 'e me, che me ne mporta,

ll'unico arraggio, ll'unico currivo,

è cchillo ca s'è chiusa chella Porta

ca s'arapeva sempe e ce truvave:

sincerità, schiettezza e onestà,

e 'o ssape sulo Ddio chi po' 'e ppavave

'e ppere cotte pe sti Verità.

Però rispetto a vvuie aggio campato!

tengo 'a cuscienza a pposto e stò tranquillo.

Napule e Ddio m'hanno accarezzato

e nfronte m'ha vasato n'angiulillo.

Furtunata

E ce steva ’na guagliona
cu ’na faccia ’e ’na Madonna,
cu ’na capa ionna ionna ,
c’’a salute assai suttile,
e cu n’anema gentile.

Puverella! A dudece anne
Primma ’a mamma lle murette
Sola sola rummanette
Cu nu pate scimunito
p’’a miseria e ll’appetito.

- Moro – dicette ’a mamma -  e nun me lagno:
 ma chello ca mme coce è ca rummane
 figliema abbandonata!…
 (Ah povera povera Furtunata!)
      
 E teneva sidece anne
Quanno ’o pate lle murette:
i’ chessà che lle venette
ca passaie dopp’’o spitale,
a ngrassà Puggeriale.

Se vendette n’anelluccio
 Pe doie cere e na curona,
chella povera guagliona…
Lle spiaino: - E mo’ addò ’e ppuorte? –
Rispunnette : - Ogge so’ ’e muorte…

E ’a llà ncoppa turnaie cu ll’uocchie russe…
E nu giuvanuttiello ’e mala vita
piglie e ncuntraie p’’a strata…
( Ah povera Furtunata!)

E ched’è sta vita nosta!
Quant’è amara e quant’è triste!
Furtunata !… ah che faciste!…
Sta creatura ca t’è nata
Mo’ addò a lasse?  A Nunziata…

(Penzatece a stu nomme ca teneva,
e a sta barbara sciorta. A sidece anne
è morta e s’è atterrata…)
( Ah povera Furtunata!)

Ll’acciso

Si ve conviene nu dichiaramento,
tant’onore pe mme. – L’onore è moi…
Ccà stesso ?? – Pe’ dimane. Appuntamento
A mezzanotte. – resta fatto. – Addio –

Quatto parole. E doppo mezzanotte,
’a sera appresso, Carmine De Riso,
pe’ mmano ’e Ciro Assante e cu tre botte,
nterra, ’int’’o vico, rummanette acciso.

Pe’ mbriaco ’o pigliano albante iuorno:
lle s’accustaie ’na femmina vicino,
e se mettette a ffa’: - Te miette scuorno?!…
Porco! A primma matina vive vino!…

Vino? Era sanco. Lle parette vino,
nterra, ’na macchia e sancofriddo e mollo…
-Sciù nnanz’’a chiesia ’e santo severino!…
E lle menaie nu cato d’acqua ncuollo…

Sfregio

Ha tagliata la faccia a Peppenella
Gennareniello de la Sanità:
che rasulata! Mo’ la puverella,
mo’ proprio è stata a farse mmedecà.

Po’ ll’hanno misa int’a ’na carruzzella,
è ghiuta a ll’ispezzione a dichiarà;
e ’o delicato don Ciccio Pacella,
ll’ha ditto: - Iammo! Dì la verità.

Ch’è stato, nu rasulo, nu curtiello?
Giura primma , llà sta nu crocefisso
( e s’ha tuccato mpont’a lu cappiello).

Dì, nun t’ammenacciava spisso spisso?
- Chi? – ha rispuost’essa. – chi? Gennareniello!
-  No! … Ve  giuro signò! Nun è stat’isso!…

’E cecate ’e caravaggio

Dimme na cosa. T’allicuorde tu
’e quacche faccia ca p’ ’o munno e’ vista,
mo ca pe sempe nun ce vide cchiù?

- Si, m’allicordo; e tu? - No frato mio;
io so’ nato cecato. Accussì cielo
pe  mme murtificà, vulette Dio…

- Lassa sta’ Dio!...Quant’io ll’aggio priato,
frato, nun t’ ’o può manco mmaggenà,
e Dio m’ha fatto addeventà cecato.

- È overo ca fa luce pe la via
’o sole?…E comm’è ’o sole? - ’O sole è d’oro,
comme ’e capille ’e Sarrafina mia…

- Sarrafina? …E chi è? Nun vene maie?
Nun te vene a truvà? – Sì…quacche vota…
- E comm’è? Bella assaie? – Sì…bella assaie…

Chillo ch’era cecato ’a che nascette
suspiraie. Suspiraie pure chill’ato,
e ’a faccia mmiez’ e mmane annascunnette.

Dicette ’o primmo, doppo a nu mumente:

- Nun te lagnà, ca ’e mammema carnale
io saccio ’a voce… ’a voce solamente…

E se stettero zitte. E attorno a ’lloro
addurava ’o ciardino, e ncielo ’o sole
luceva, ’o sole bello, ’o sole d’oro…

’O ’nteresse

Quante so’? . So’ se’ solde… Embè?… Scusate:
ll’ati quatto v’’e ddongo viernarì…
Sette, allora. – Comm’è? M’aumentate
tre solde pe tre ghiuorne, se’ Marì?!

- Te cummiene? – Ma comme? Ve pigliate
chisto nteresse ? – Oi ne’, tu ’e buo’  accussì?
M’è ditto niente quanno t’aggio date?…
È troppo giusto… che ve pozzo dì?…

Penzate ca maritemo sta a spasso,
ca nun me porta niente pe magnà,
ca sta facendo ll’arte ’e Micalasso!…

- Bella mia tu che buò ? Che t’aggia fa’?
È giusto, è giusto…nun ve mporta niente…
Vevitevillo ’o sango de la gente! …