Luciano Somma è nato a Napule o' 18 'e màrzo 1940 e doppo quacche mese ch'arapette ll'uocchie succedette 'a
guerra! Accumincià a scrivere puisie e canzone a 13 anne, ma 'e primme
puisie 'e pubblica 'o sissanta partecipannoa tanti cuncorse e
vincenneno paricchie, doje vote ha avuto 'a medaglia 'argiento d''o presidente da repubblica. Ha scritto 'ncoppa paricchie giurnale e riviste, ha fatto parte 'e parecchie assucciazione e accademmie Italiane e furastiere. Chi canosce internet trova Luciano Somma inta paricchie pizze, sta sempe 'mmiezo addò ce sta puisia. Ha scritto 'e pparole e tanta canzone, so già cchiù 'e ottuciento, ca so' cantate a tutte pizze do munno pecchè internet arriva pure 'int'e pizze cchiù stramane... È spusate 'a quarantaduje anne tiene dduje figlie mascule e tre nipute.
Bibliugrafia
Jonte
‘O mmale ‘e nu munno ‘mpazzuto
me trase ‘int’’o core stasera
nu core ca cerca n’aiuto,
l'aiuto 'e na mano sincera…
Pe’ ll’aria nu suono ‘e zampogna
me porta ‘a nuvena ch’è doce
ma è spina ca ‘mpietto me pogna
sentenno pesante sta Croce.
Sole ‘e Natale puortece
‘o pizzo a rrisa ‘e Ddio
cu’’o verde d’’a speranza
pace e serenità
dacce dint’’a sti juorne
carezze d’alba, ‘e cielo,
scacciala 'a nuje pe' sempe
tutta sta ‘nfamità!
Ll' urdemo suonno d'Austo
se sceta c''o primmo 'e Settembre,
stasera è n'incanto!
'O cielo è amaranto, na rèfola 'e viento
doce comme 'a carezza 'e nu bbene
amara comm 'o ffele d''o chianto
me porta
na chiorma 'e penziere
ch'affollano 'a mente
e metteno ncroce stu core.
Vurria ca chiuvesse e nun chiove...
vurria tanta nuvole attuorno
ma 'a luna è d'argiento...
Vurria ca nu suonno turnasse
ma 'o suonno nun torna.
Stu suonno è partuto
'ncopp''a ll'onne
'e ll'urdema sera d'Austo
lassannome
nu grappolo 'e stelle
miez''a nu cielo amaranto
'int''a sta sera 'ncantata
d''o primmo 'e Settembre.
...E guardo 'o mare
ma chesta sera l'onne
songhe 'o ritratto
'e sti penziere mieje
veneno e vanno
comme 'e ricorde
ca se perdono
là
addò l'acqua se vasa c''o cielo.
'A terrazza è deserta
nun me voglio affaccià
nun è 'o mumento
e pò pe' fa che cosa
ma pecchè?
meglio a fa finta 'e niente.
...E guardo 'o mare
'nnanze all'uocchie
'a tristezza
'e na pioggia d'autunno.
Tu ‘ncopp’’o palcoscenico
si’ stato n’attrazione,
‘o rre d’’o munno comico
pe’ tre generazione.
Verace figlie ‘e Napule
n’he dato buonumore,
sapive fa miracule
cu’ l’arte toia d’attore.
Madò, che Ddio ‘e cervella
tenive comme autore
pe’ scrivere : ‘A LIVELLA
e ‘O FINE DICITORE.
Pe’ fa na MALAFEMMENA
ch’è nu capolavoro,
canzona chiena ‘e sémmena
ch’ogge se canta ancora.
A sta città che campa
‘a sempe ‘int’’o turmiento
tu c’he lassate ‘a lampa,
nu sciummo ‘e sentimento.
N’eredità ‘e surriso
nu testamento ‘e core
na luce ‘e pizzo a rrisa
l’oro ‘e nu ‘nduratore.
E pe ringraziamento
t’avimmo dedicato,
TOTO’, nu monumento
tutto pe tte, allustrato!
Napule è na famiglia
aunita ‘int’’o calore
e tu ca lle si’ figlio
nun può murì, nun muore!
Testo di Luciano Somma – Musica di Taddeo Scalici
Austo , ‘nterr’’a rena tutt’’e dduje
Guardammo comme ‘o sole se ne va
E chianu chiano accumparisce ‘a luna
Ch’all’intrasatto ‘o bbene fa sunnà …
Cu’’e mmane dint’’e mmane , vocca a vvocca ,
assapurammo sta felicità
e correno sti core forte ‘mpietto
e nuje nun ce stancammo e ce vasà .
‘O mare ci’accarezza e ‘ncielo ‘e stelle
pare ca se mettessero a ballà
na voce canta e na chitarra sona…
e intanto io mo accummencio già a penzà:
ca tu dimane parte , te ne vaje ,
luntano a me, dint’a n’ata città
chisà si quacchevota penzarraje…
ma ‘o tiempo tutt’’e ccose fa scurdà .
Austo chesto fa : scummoglie AMMORE
Ca po’ Settembre vene a cummiglià;
‘e na passione doce ‘e na stagione
forze manco ‘ o ricordo restarrà .
DAL CD AMMORE PE' NAPULE
Canta TADDEO
Surgiente
Se so’ stutate ‘e luce ‘int’’a nuttata
Povere ‘e luna ‘ncopp’a sta città
‘o viento nun asciutta sti paure
e l’aria ‘e mare trase ‘int’’e pulmune
zitte, stanno durmenno sti ccriature.
Chest’aria ‘e mare
Ma comme sape ‘e chianto st’aria ‘e mare
Na vranca ‘e fronne gialle ‘int’’e penziere
Cu na speranza appesa a na scugliera.
P’’e viche cchiù nun sonano ‘e chitarre
Se so’ addurmute ‘e ddete ‘ncopp’e corde
So’ nuvole luntane sti ricorde
So’ ragge ’e luna stise ‘nterra ‘a rena.
Chest’aria ‘e mare
Profuma ‘e suonno antico st’aria e’ mare
Fantasma arruzzunuto dint’’a varca
Ca chianu chiano se ne va luntana
Lenta scumpare macchia all’orizzonte
E resta ‘o mare… solamente ‘o mare…
Tu staje durmenno ‘a troppo tiempo ormaje
‘mbraccia’’e ccanzone , ‘o sole , ‘a luna , ‘o mare ,
mentre tenimmo na muntagna ‘e guaje
assapuranno ‘e llacreme cchiù amare .
No , nun se pò campà na “ sceneggiata “
C’’o popolo ch’è sempe ‘o primmo attore
Cu’ na ferita antica maje sanata
E tante e quante spine dint’’o core .
Giesù Cristo scennette ‘ncopp’’a terra
Fui mise ‘ncroce ma resuscitaje
chesta città sta sempe miez’’a guerra
senza truvà nu poco ‘e pace , MAIE !
‘Ncopp’’e disgrazie stanno speculanno
arricamanno ciente e cchiù busche
stammo dint’’a ‘mmunnezza ma nun sanno
‘o sudore che scorre miez’’a via…
‘O sanghe ca se jetta pe’ dà ‘o ppane
a tanta vocche a stommaco vacante
campanno cu’’a speranza ‘e nu Dimane…
suffrenno ‘int’’o silenzio comm’’e sante .
Basta però chisto è ‘o mumento , ll’ora
Tu staje durmenno ‘a troppo tiempo e ‘o ssaje
È overo ca vulisse durmì ancora
Ma è fore tiempo ‘o suonno ca te faje.
Chitarre , manduline ,serenate ,
so’ solamente na scenografia
sulo ricorde ‘e juorne ormaje passate,
NAPULE , nun se campa ‘e fantasia!
Levate ‘a cuollo ‘e panne d’’a reggina
E miettete cu’’a capa e c’’o pensiero
A straccià tutte quante ‘e ccartuline
Ca nun so’ cchiù ‚o ritratto tuoje sincero .
E arapele chist’uocchie finalmente
Facimmelo stà zitto chistu munno
E faticammo dignitosamente
Pecchè è fernuta l’epoca d’’e suonne .
Chisà chi te l’ha dato ‘sta pacienza
eppure tutt’’e juorne ‘e vaje cercanno
pecchè tu ‘o ssaje so’ aneme ‘nnucente
pirciò suppuorte chello ca te fanno.
Tu si cusciente ca songo creature
e penzarraje: facimmencelle fa
te tiene na carocchia, t’abbandune
e te staje quieto senza risciatà.
‘E guarde ‘nfunno all’uocchie, ‘e tiene mente
cercanno d’’e capì d’’e fa pazzià
e quanta vote po’ ‘mpruvvisamente
e zumpe ‘ncuollo p’’a felicità.
Cu lloro cchiù ‘e nu cane tu si’ ‘o pate
e guaje a chi s’azzardasse d’’e tuccà
avesse ‘a te ‘a cchiù grossa muzzecata
tu ce appezzasse ‘a vita p’’e salvà.
E io ‘e vvote penzo ca si’ chisto è ‘o munno
se so’ sbagliate a te chiammà: animale
‘a vera bestia è sulamente l’ommo
tu no – nun saje nemmanco che d’è ‘o mmale.
‘O mmale stà int’’a ll’anema d’’a ggente
ch’arrobba e accide senza ave’ pietà
va na cullana ‘e lacrime spannenno
senza curarse ‘e tanta ‘nfamità.
Sulo nu sguardo friddo, indifferente,
dato p’’o da’, accussì, p’educazione,
aiere èvemo tutto, ogge cchiù niente:
comme è busciarda, ‘e vvote, na passione.
Che lamiento picciuso è ‘stu rosario
senz’albe nove, che malincunia,
na scena muta e po’ cala ‘o sipario
cummiglianno finanche ‘a nustalgia.
Addio carezze ‘e bbene avvellutato
chiene ‘e speranza che devano aiuto!
‘O tiempo a tutt’’e dduie ci’ha trasformato:
che resta ‘e chill’ammore? Nu saluto…
Nu cielo chiaro,
comme a nu specchio,
lucente , brillante !
Nu sole cucente
'nfoca
tutt''e ccose attuorno .
Ma chiove…si, chiove
Dint''e core d''a ggente
Che CHIAGNE.
So' ciente , millanne
Che CHIAGNE
E nisciuno ,si , proprio nisicuno
Fa niente pe' niente…
Eppure sta NAPULE
Ha dato a stu munno
Nun solo canzone
Ma tutta na storia
Ch''a lettere 'e fuoco
Stà scritta
'int''o libbro d''a vita .
'O cielo è sereno,
'o sole è n'incanto
ma chiove…si,chiove
'int''e core d''a ggente
che campa dicenno
'a millanne : …
Ma quanno s'addorme
Nun sonna
E quanno se sceta 'a matina
Nun trova
Ca 'o stesso d'ajere .
Eppure dimane
Sarrà comm'a sempe :
nu sole cucente
ma chiove…si,chiove
'int''e core d''a ggente !
LUCIANO SOMMA
Da DIMANE
Prefazione di SALVATORE CERINO
Ed.Degli artisti- Napoli 1977
‘Int’’o mare d’’o munno ferito
quanta stelle cadute,
e ll’onne ‘mpazzute
se portano a rriva
l’arraggia d’’o viento,
pe’ copp’’a scogliera
se cerca na luce
ca desse nu filo ‘e speranza,
ma s’è fatto tarde, è già sera…
È sera pe’ ll’aria, malata,
addò pure ‘o respiro
s’ammesca cu’’e nnote cchiù amare
‘e na musica antica
che porta ‘o mutivo viulento
d’’a sete ‘e putere.
Nu scunciglio ‘e gabbiano
attuorno
tortura na povera vela
ca tremma e se perde
cadenno pe’ copp’’a scugliera,
nisciuno cchiù ‘a salva
pecch’è troppo tarde, è già sera…
È sera pe’ chi va truvanno
nu pizzo stramano
supplicanno na vita serena
ma cchiù nun trova na mano…
È sera pe’ chi ‘e ll’onestà
ha purtato ‘a bannera
sfrasturnato ‘a ‘stu globbe ca gira
‘o cuntrario d’aiere,
e more n’altare ‘e speranza
mentre n’organo sona
‘o trionfo d’’o mmale,
cchiù forte, ogne ghiuorno, cchiù forte
marturianno ‘a tastiera.
‘Int’’o mare d’’o munno ferito
s’è fatto tarde, è già sera…
‘O palpito ‘e mille campane
che sonano p’’a mezzanotte
‘a gioia che da’ st’ammuina
anticipa nu quarantotto.
Aunite, c’’o sciato ‘e ll’affetto,
ce sta’ tutta quanta ‘a famiglia
è doce a campà stu mumento
ch’astregna sti core, atturciglia.
Miraculo ‘e n’attimo ‘e pace
na sosta pe’ l’anzia e l’affanno
pe’ nuje, ca pasture ‘e presebbio,
avimmo campato nat’anno.
Vurria ca stu tempo nemico
Putesse fermà sti minute,
sti facce, sti vvocche, sti mmane,
na voce ch’allucca: Salute!
Chist’uocchie che guardano ‘a cimma
‘e n’albero addò l’abbundanza
sta dint’’e ggranate d’’e lluce
ch’appicciano ‘o ffuoco ‘e st’ausanza.
Chist’uocchie ca cercano ‘o bbene
tra mille culure ‘e biancale
stunate e ‘mbriacate p’’o vino
mo so’ lampe ‘e vita, è Natale!
Doppo chello ca c'è stato
Senza manco nu saluto
Bene mio tu m'he lassato
Accussì senza penzà
Ca m'he dato nu dulore
E stu core inutilmente
Ha cercato pe' tramente
Sulamente 'e te scurdà
E mo saccio pecchè
Io quanno faccio 'ammore
Annanze all'uocchie
veco sulo a tte!
A tte ca staje luntana
E che sento vicino
Ch'arteteca, e na smania
ca nun me vo' lassà ,
te chiammo ogne mumento
me sierve pe' campà .
Ch'aggia fa tutto è fernuto
'nzieme 'o tiempo
ch'è passato
Dint''e vvene si' restata
Me faje chiagnere e dannà
Tu staje dint'a tutt''e suonne
Dint'all'aria ca respiro
Chesta vita se ne fuje
Addò staje felicità ?
'O friddo, stu friddo,
che sento 'int''e vvene
che gela sti ccarne
che tremma 'int''o core
me porta l'affanno
d''o mmale d''o munno
cchiù funno d''o funno
cchiù amaro d''o chianto.
Nu poco 'e calore
purtarria 'o sereno
na smania d'ammore
ca invece nun vene
...e 'o friddo me pogna
cchiù acuto 'e na freva
stu ghiaccio è tagliente
che trase e cammina.
'O sanghe malato,
'o ppane stentato,
na mano ch'accide,
na voce 'e dannate.
Stu friddo è pussente,
me pare n'inferno
sta vita ca è niente,
però nun è vierno!
Pure ‘o cardillo nun tene cchiù voce…
Io guardo ‘e rame sicche , scunzulato ,
‘o Crucefisso ‘e sta vernata ‘ nCroce ,
‘o cielo ‘e chiummo pare nu malato .
Vicino a nu telefono ch’è muto
Comme so’ lente l’ore d’’a ghiurnata
‘a stanza pare fosse nu tavuto
pure ‘a televisione àggio stutato .
Mo ‘nfaccia ‘e lastre ‘o viento se lamenta
comme ‘o chianto picciuso ‘e na criatura
e stu penziero ‘e te che me turmenta
‘a luntananza , ‘o ssaje , mme fa paura .
‘Mpruvvisamente ‘o lampo ‘e na tempesta
pe’ n’attimo fa chiara ‘a stanza scura ,
sbatteno tutt’’e pporte d’’e ffeneste ,
tremmano tutt’’e quadre ‘nfaccia ‘e mmura .
All’intrasatta sona ‘o campanello
Vaco arapì e te veco ‘nnanze all’uocchie
‘nfosa p’’a pioggia , stanca , piccerella ,
sento nu tremmulio dint’’e ddenocchie .
Doce accussì nun t’àggio vista maje
Ma nun parlà , dicisse na buscia…
Addò si stata nun me ‘mporta e ‘o ssaje
grazie ca si’ turnata , figlia mia .
Vinte ‘e Dicembre
dint’’a casa mia
sto sprufunnato ‘ncopp’a na pultrona,
vicino a mme muglierema che stira,
lasso pe’ nu mumento stu giurnale
pe’ tenè mente
l’albero ‘e Natale.
Guardanno ‘e ppalluccelle culurate
s’appiccia ‘int’’e penziere
n’arcubaleno ‘e ggioia
facendo chesta mente sfrennesià.
Torna
nu desiderio ‘e bbene luntano,
quase scurdato,
‘e panne a stirà so’ fernute…
Muglierema s’assetta ‘nzino a mme!
Che gulio che m’afferra
che sapore
st’abbraccio mo tene ‘o calore
d’’o ffuoco ‘e biancale
na carezza, nu vaso
ardente e carnale
finalmente quaccosa ‘e sta vita
pe’ n’attimo vale.
Quanto me piace st’albero ‘e Natale…
Io me disperarria
si guardanno ‘int’’o specchio ‘e ll’uocchie tuoje
vedesse l’ombra ‘e n’ato e arrassusia
iesse ‘int’a cchiesia, comme a nu pezzente,
senza sentì, preganno, ‘a voce ‘e Dio.
Io me disperarria
si avesse purtà ‘a croce d’’a vicchiaja
sulo senza ‘o calore ‘e na carezza
sulo ‘int’’o ggelo ‘mbraccia a na tristezza
ch’arrubbarria sta vita ‘a dint’’e mmane.
Io me disperarria
si all’intrasatta s’asseccasse ‘o mare
si doppo ‘a notte nun spuntasse l’alba
si nun sentesse cchiù dint’a stu core
‘e palpite d’’o bbene ‘e mamma mia.
Tanno, e sultanto tanno, io overamente
nun disperanno cchiù ne murarria.
Nu mare traggico
'ncrespato d'onne
e a riva, 'nterra 'a rena,
na rezza che chiagne
lacreme 'e solitudine:
L'he visto maje?
Na notte senza luna
e, arravugliato e nniro,
senza respiro 'o cielo
cu''e stelle annascunnute,
comme a tanta criature,
sott''o mantesino d''e nuvole;
L'he visto maje?
N'albero guagliunciello
cu'' fronne ancora verde
ca 'o viento fa spezzà
senza pietà, accussì, 'mpruvvisamente,
l'he visto maje?
N'auciello appecundrute
ca cerca 'o nido
comme n'ommo cerca 'o ppane
e tutto appaurato
cercanno prutezione
se chiagne na frunnella e na cajola;
l'he visto maje?
Si tutte chesti ccose, ammore mio,
tu 'ncopp'a strada toja
nun l'he truvate ancora,
si overamente nun l'he viste maje
nun 'e ccercà
basta che guarde 'nfunno a chistu core
e a' una a' una
certo 'e pò truvà.
Si penzate ca ‘e solde sulamente
Ve ponno da’ salute , gioia e ricchezza ,
lassate stà , nun ‘mporta , nun fa niente ,
nun leggite stu libbro , è na schifezza .
Facitelo restà dint’’a vetrina
Passate annanze , nun ve ne curate ,
nun è ‘a ricetta pe’ na medicina ,
pirciò , sentite a mme , nun l’accattate !
Me sento ricco , e nun tenco na lira ;
me sento Re senza tenè na corte ;
ma ‘o patremmonio e ‘o regno è chesta Napule
ca ‘a vonno fa murì , ma nun è morta !
Napule è sempe chella…tale e quale:
cu’’o mare generoso , chin’’e core ,
ch’è ancora ‘a vita pe’ nu piscatore ,
ch’è tutt’’o munno pe’ nu puveriello .
E vaco a Margellina tutt’’e ssere ,
ncopp’’a scogliera : ’o posto è prenotato !
pe’ vedè ‘o spettaculo ‘e sti lluce ,
e quanta cose ca stu core sente …
Nu poco ‘e chesta musica ca ‘o mare
Mme porta tutt’’e ssere , puntualmente ,
sona pe’ mme , o almeno accussì pare :
quanta felicità ‘st’appuntamento !
Migliar’’e botte ‘ntronano p’’e viche,
sciumm’’e spumante corrono p’’e ccase.
È mezzanotte, e l’anno ch’è fernuto
c’’o cchiù bello surriso ce saluta.
Chioveno da’ e balcune e da’ e ffeneste
butteglie, fiasche, ‘nzalatiere rotte,
piatte sengate e vase ‘e terracotta
fanno ‘nzerrà d’’e vasce tutt’’e porte!
Chi se scagne ‘n’abbraccio e chi nu vaso
tutte felice, vecchie e guagliuncielle,
tutte so ricche, pur’’e puverielle
o munno, pe’ n’istante, s’’e cagnato.
Ma comm’a nu cardillo senza voce,
dint’a chist’angulillo senza luce,
ce stà nu core ca nun trova pace
‘nzerrato ‘mpietto, stracquo ‘e tutt’’e ccose.
Comm’a nu cane senza cchiù padrone
comm’a ‘n’albero senza cchiù ‘na fronna
io stongo sulo, mentre se struje lenta
‘a fiamma ‘e ‘na cannela c’allummaje.
Cu’ nu bicchiere ‘mmano ch’è vacante
voglio fa quacche brinneso sultanto:
nu brinneso a chi tutto s’ha pigliato
e niente ha dato.
Nu brinneso a’ salute ‘e chi ha lassato
‘o core mio pe’ ‘n’ato!…
I
Pure l'aria, ammore, parla 'e te,
e dint''o core cride staje sbattenno sola tu
M'he lassato chesta solitudine
ca fa dannà
io t''o giuro nun ci''a faccio cchiù
me sceto tutt''e notte e dint''o scuro veco a tte
quase comme fusse n'incantesimo
sempe tu
ca t'he pigliato 'a vita mia
ca nun conta niente senza 'e te!
Tu luntana 'a me
Te staje fidanno 'e sta, sembra incredibile!
M'he lassato nu dulore e mille spasime
Ca nisciuno a chistu munno po' sanà
Luntana 'a me
Tu luntana 'a me
rieste sempe nu ricordo incancellabile
E i' campanno sto murenno senza 'e te!
II
Io mo sto spianno ma pecchè
me sta criscenno 'a smania
e sta passione 'mpietto a mme
Comme so' cucente chesti lacrime
ca scenneno
Si 'a tristezza ca nun vo' fernì
Si 'a sola stella dint''o cielo ca nun brilla cchiù
nu ricordo doce ca fa chiagnere
Sempe tu
Ca m'he stracciato na poesia
Ca se sta perdenno 'nzieme a tte!
Addò stà chillu profumo d’ammore
mò ca svestita ‘e speranza
sempe bella ma pallida e stanca
me guarde e me tremmano ‘e mmane?
Ancora te prego, nun vide?
Ancora te supplico, siente?
Ma allora nun vale cchiù niente
sta fede che porto pe’ tte.
E a tte cerco ll’urdema luce
ca rischiarasse stu’ core
ma nun te n’adduone ca io moro
iuorno pe’ ghiuorno accussì.
Senza ‘a carezza ‘e na mano
ca me facesse coraggio
pe’ suppurtà nu calvario
ch’è troppo grande pe’ mme.
E allucco, chiammo, iastemmo,
cu’ tutt’’a forza ‘e ll’affanno
ma dimme pe’ quanto, ma quanno
stu cuorpo po’ ancora aspettà.
E dint’a sta chiesia vacante
tu bella ma pallida e stanca
me guarde e io te prego, nun vide?
Ancora te supplico, siente?
Na fronna verde,
cchiù verde d’’o verde,
p’’o sciuscio ‘e nu viento maligno
sta cadenno
spezzata,
po’ n’ata
e n’ata ancora,
e nisciuno ca dice a stu viento:
mo fèrmate, basta!
Ogni ghiuorno che passa
È cchiù vecchio, cchiù stanco;
tene ‘a voce abbrucata e ‘o lamiento
è cchiù lento;
ogni passo è pesante
pe’ tramente ‘int’a llaria
‘o suspiro è turmiento.
Chistu tempo ch’è amico e nemico
Cammina p’’o munno
Cu’ rilorge ‘mpazzute
Lancette cagnate…
Ma pe’ vvie ‘e ll’Universo se sente
na musica nova che Dio
sta sunanno pe’ l’ommo ‘e dimane
ca nun è certamente Gesù…
Si asciuta dint’a nu capriccio ‘e sole
scetata cu’’o profumo ‘e n’alba chiara
so’ palummelle doce sti parole
che staje dicenno-comme mme si cara!
L’uocchie so’ specchio ‘e perle ‘mmiez’’o mare
‘a vocca toja carnosa è na cerasa
e l’oro d’’e capille mo me pare
na ricchezza ca regna ‘int’a sta casa.
Addò campammo nuje che a bbona ‘e Dio
ancora ce vulimmo tantu bbene
è nu gemello ‘o core tuojo cu’’o mio
che sbatte forte e fa tremmà sti vvene.
Una cosa però t’arraccumanno,
e so’ sicuro nun m’’a negarraje,
quanno facimmo amore, e sulo tanno,
nun di’ ca te sfastidie, nun sia maje!
Si ricco, è overo, ma si’ pretenziuso,
e guarde ‘a ggente comme si ‘a schifasse
staje carreco ‘e denare, te n’abuse,
e vaje facendo ‘a mangiatòra vascia…
Te si’ accattata ‘a villa a rriva ‘e mare
na machina veloce, n’aeroplàno,
e te mantiene ‘a meglia d’’e “cummare”
ca te fa arrecrià nuttate sane…
Tu te ne vide bbene, chesto è giusto,
campanno ‘a vita toja meglio d’’a mia
‘e chistu munno n’assapure ‘o gusto
mentr’io m’’a sonno ‘a scrivere poesia…
Ma ‘o fatto ca faje troppo ‘o superbiuso
credennete, chisà nu pataterno
me fa penzà ca te scuorde na cosa:
‘a vita è nu passaggio sulamente…
E’ nu suonno ‘e na notte sultanto
si ammesurammo tiempo, eternità…
pirciò tutt’’a superbia e tutt’’o vanto
se ‘nchiova ‘nnanze a Dio, all’immensità.
E quanno ‘a nase ‘e cane vene a leggere
vicino a porta toja pe’ te chiammà
tu può cercà cu’’e solde d’’a “corrompere”
ma ‘a morte è ONESTA, nun se po’ accattà!
Gesù
ogn'anno nasce e muore
po' te ne saglie 'ncielo e statte bbuono!
Ma 'e cchiesie so' vacante...
'Naffaccia 'e mmura
c''o sanghe d''a ggente
ce sta scritto cu' l'odio e 'o disprezzo
'a storia 'e stu munno ca 'nfunno
nun tene cchiù niente.
Ma qua resurrezione
si ci'avutammo attuorno
e nun vedimmo ca miseria e mmorte!
'A vita è nu passaggio
ma cu' quale curaggio
nuie passammo pe' chesta via 'nfame,
addo pure 'a preghiera è na jastemma!
E miez''o cielo
pure l'aucielle sentono dulore,
'e rrose nun so' rrose sulo spine,
'e sciure cchiù nun teneno prufumo,
l'ammore è sulamente na parola
ca se dice cu''a freva 'e doje vocche
quanno 'o cuorpo s'astregne cu' n'ato,
na cummedia, na scena,
ca fernesce a sipario acalato.
'A fede m'ha lassato,
nun credo cchiù a nisciuno,
'a puisia è luntana 'a chistu core,
so' addiventato juorno pe' ghiuorno,
'nzieme cu' ll'ate, pur'io nu peccatore.
E nun voglio penzà
ca tutte chesti ccose malamente
so' frutte d''o peccato origginale,
pecchè si accussì fosse allora Ddio
si tale e quale a nuie, ca nun perduone,
e addò sta cchiù
chill'essere perfetto,
ch'è giusto, superiore, ch'è divino.
Qualunque tuorto nuie t'avimmo fatto
è troppo gruosso 'o prezzo ca pavammo
e nun ce può lassà
comme a na mamma, snaturata e 'nfame,
c'abbandona nu figlio miez''a via,
facennole mancà calore e ppane...
Voglio penzà ca esiste, tu si Ddio?
Chisto mumento ca l'he dimustrà
o ce distrugge anite tutte quante
oppure l'he a salvà 'st'umanità.
‘A luce ‘e na lampara
miez’’o mare
culora ‘argiento l’onne
schiara ‘a prora
‘o piscatore tira ‘a rezza
e pare
ca sta natura canta e se cunzola .
Nuttata doce ca se porta
‘nzino
tutto l’affanno ‘e na jurnata
amara…
ne voce , n’ata voce , n’ata ancora ,
tira Tatò , ca sta venendo ,
tira!
‘A vita . chesta vita ,
‘e vvote avara ,
‘e vvote ricca , ‘e vvote senza core ,
regala chesto
pe’ se purtà fore
‘o carreco
‘e nu tummolo ‘e penziere .
Na nuvola scumpare , po’ accampare ,
‘a copp’’o cielo
cchiù abbuffata
e nera
po’ chiove e ‘o viento
se lamenta e cade
‘a pioggia ,
tutte lacreme d’’o cielo…
‘A luce ‘e na lampara
miez’’o mare
se stuta e ‘a varca
lenta torna a rriva
addò l’aspetta
‘o solito via vaie ,
mugliera , figlie ,
rezze ‘nfose , guaie…
Nun s’assapora
‘a gioia
senza chianto;
chisto è ‘o destino
‘e ‘na criatura ‘e Ddio.
‘O chianto, ‘a vvote,
‘e na liberazione
doppo te siente meglio.
Pecchè, pecchè dich’io
P’avè ‘nu filo ‘e luce
Avimmo sempe pavà
Na vita d’ombra?
Tu nun me guarde cchiù comme a na vota
e chesto è naturale
‘o tempo primma appanna e po’ cancella
amore, affetto, desiderio e bbene.
Tant’anne ‘nzieme
tra gioia, dolore, affanne, anzie, turmiento,
è comme nun l’avessemo campate
è comme si nun fossero mai nate!
Mo ca nun te so’ cchiù nemmanco frato
me vide comme fosse nu peccato
che staje scuntanno stanca e rassignata,
‘o core ‘mpietto a tte s’è congelato.
Chi ‘o po’ scarfà? So’ certamente ‘e figlie
o l’ombra ‘e n’ato ca mpruvvisamente
‘a nu suonno luntano, o ‘e stu mumento,
te gira attuorno, te fa luce, abbaglia.
O forze no, songh’io ca sto vedendo
cu’ l’uocchie stanche ‘e n’anema agitata
sultanto ‘o mmale ca me porta ‘nfunno
int’’o mare e sta vita scunzulata.
Tu nun me guarde cchiù comme a na vota
pur’io però me songo trasfurmato
strigneme ‘a mano, dammece st’aiuto,
scusame, amore, si me so’ sfugato…
Astregnere ‘int’’e mmane
‘a mana ‘e chi vuò bbene,
truvà int’’o funno ‘e ll’uocchie
‘e na criatura
chella ‘nnucenza ca nun tiene cchiù.
Guardà nu mare placido
int’a na sera ‘austo
sentì ‘o suspiro ‘e ll’anema
ca se cunfonne
c’’o respiro ‘e ll’onne.
Arretirarse ‘a sera
e vedè attuorno ‘a tavula
tutt’’a famiglia aunita,
sentì nu figlio
ca te spia cunziglio
facennete capì
ca tu le sierve,
tu le sierve ancora…
Dicembre.
Dint’a sta casa,
atturniate all’albere ‘e castagne,
vicino ‘o ffuoco lento ‘e nu camino
d’’a ‘e lastre d’’a fenesta
veco ‘a montagna ‘e me vene ‘a penzà…
Me pare nu presebbio stu paese
addò ‘o silenzio è amico
luntane d’’o frastuono d’’a città.
Fra mezz’ora è Natale,
io pare San Giuseppe e tu Maria,
simme rimaste sule,
‘e figlie stanno nzieme ‘e nnammurate
ncopp’’a neve a scià.
Io e tte mò stammo n’ata vota sule…
Te guardo e veco ll’uocchie
Nfuse ‘e chianto,
‘o core ‘e mamma è triste
pe’ chesta luntananza
e ‘o calore d’’a stanza
no, nun t’abbasta, né abbastarrà maie,
a regnere ‘o vacante
ca siente dint’all’anema.
‘A campana d’’a chiesia,
sona dudece vote: E’ mezzanotte!
Sona pure ‘o telefono: Auguri a tutt’’e dduie Mammà e Papà.
Natale ce arrevoglia
cu na coperta nova
e ‘o vaso ca me daie
tene ‘o sapore d’’a tranquillità.
Ma io sento, e so sicuro ‘e nun sbaglià,
ca è solamente nu mumento ‘e pace
t’’o vveco dint’all’uocchie,
quase comme leggesse int’’o pensiero,
ca ‘o core tuoie è luntano
miez’’a neve…
E guardo ‘o ffuoco lento d’’o camino,
nu tronco ‘e quercia ca s’è cunzumato,
‘a cennere ‘e nu foglio ‘e calannario…
E'autunno!
Mmiez''o nniro-fummo 'e ll'aria
p''e vvie 'e sta città
senza cchiù verde
veco n'albero annuro
e attuorno a 'e rame sicche,
scheletrite,
na chiorma d'aucelluzze appaurate...
E' nu lamiento 'o suono, è nu rummore,
comme 'mpazzute voleno
pe' nu suspiro: ussiggeno...
N'accanimento inutile!
...e a uno a uno cadeno
'ncopp'alsfalto traditore e ummedo
d''o marciappiede sulitario e traggico.
Vedennele accussì
sponta na lacrema
'e na tristezza
ca nun se pò credere.
VICO NAPULITANO
E’ sarracena sta strada ‘nfosa;
‘na fila ‘e vascie , nu vico chiuso,
so’ goccie ‘e chianto sti panne spase,
na stanza pare ca è nu pertuso.
Fenesta vascia , cu’ na Maria,
ca me faceva sunnà l’ammore,
t’hanno ‘nzerrata cu’ na buscia
d’’o terremoto ch’è senza core.
Chesta canzone , canzone amara,
porta ‘int’’e nnote cchiù ‘e nu dolore
quanno se perde na cosa cara
se po’ ascì pazzo , ce stà chi more!
Na mano sfila ‘int’’a sacca onesta
Na vocca strilla ‘nfaccia ‘e prumesse
È sulo ‘arraggia chello ca resta
Quanno nu popolo è cuppo ‘allesse.
Aiere ‘o vico santo nun era
Si l’attuccava te deve ‘a mano
Ce steve ‘a risa, ce steve ‘o chianto,
era nu vico Napulitano.
LUCIANO SOMMA
Quanta facce tene ‘o munno
Janche , gialle , rosse , more ,
ma si scave ‘nfunno , ‘nfunno ,
unu sulo però è ‘o core ,
che s’affanna p’’a ricchezza
cu’ na lengua universale
regna l’uocchie d’allerezza
po’ fa male cchiù d’’o mmale !
E’ nu suonno ‘e nu pezzente
Senza Dio , senza nu santo ,
è ‘a carezza ‘e tanta gente
ca nun sape che d’è ‘o chianto .
E pruvate a ghì ‘int’’e ccase
‘e chi lassa chesta terra
strille , allucche ,quacche vase ,
e po’ doppo ce stà ‘a guerra !
Si spiate ‘e schiattamuorte
Ve cuntassero romanze
Quanta storie , quanta tuorte ,
senza maje tenè crianze .
Quanno more nu pezzente
Pure ‘o frato , ‘o cchiù carnale ,
va neganno ca è parente ,
chi ‘o canosce st’animale ?
Chest’è ‘a vita ‘ncop’’o munno
è na voce universale
ca nun cagna e fino ‘e ‘nfunno
fa assale male ,cchiù d’’o mmale !
Si stammo ‘ncopp’’a terra
pe’ ce spartere
e stammo ‘mmiez’’a guerra
pe’ cumbattere
si ce simmo scurdato
che d’è ‘o credere
si sulo pe’ capriccio
avimma nascere
è venuto ‘o mumento
‘e nun ci ‘arrennere
a chesta umanità
senza cchiù scrupule
a chesta ‘nfamità
ch’affoca l’anema,
è l’ora d’’a fernì
cu’ tanta chiacchere.
È l’ora ‘e nun sprecà
cchiù tanta lacreme
e ‘a vita nun sarrà
nu vuoto a perdere!
N’ombra cummoglie chesti strade antiche
strette e affucate n’copp’a sti quartiere
addò ‘o respiro è affanne dint’’e viche
e l’arte d’arrangiarse è nu mestiere…
Eppure quacche vota sponta ‘o sole
dint’’all’uocchie ‘nnucente ‘e na creatura
“è tale e quale a ‘o pate “, so’ ‘e parole,
“Giesù ma comm’è grande sta natura”.
Ma è destinato e scritto ca stu sciore
Ca è nato e criscarrà dint’a nu vascio,
nun truvarrà mai spazio ‘a parte ‘e fore
scusate : faccio d’evera nu fascio.
Ma che se po’ ‘mparà miez’a na via
l’arruobbo, ‘o scippo, ‘a droga, ‘a delinquenza,
‘e vvote currarrà cu’’a fantasia
e ‘a scola ‘a stiente pigliarrà ‘a licenza.
Quant’è bellillo, è tale e quale ‘o pate,
mò dice ‘a ggente a chistu guagliunciello
pate che stà ‘a vintanne carcerate
p’eredità le lassa nu curtiello…
Sciore che schiuppe miez’a chesta gente
che nasce e more ogn’ora, ogni mumento,
tu si te può salvà ma overamente
vulanno miez’’e campe ‘mbraccia ‘o viento…
Songo mariuolo, è overo, aggio arrubbato,
ma no pe’ sfizio, pe’ necessità
e comme a’ n’alluccuto so’ caduto
juorno pe’ ghiuorno ‘int’all’oscurità.
Da ‘o carcere so’ asciuto, so’ trasuto,
nu sacco ‘e vote chi ‘e po’ maje cuntà,
quanno aggio ditto: basta! Mo è fernuto,
so’ stato po’ costretto a’ccummincià.
Ce stà chi dice ca so’ delinquente,
nun costa niente ‘e vvote giudicà,
vulevo campà io pure onestamente
e aggio cercato ‘e me riabilità.
Ma a ogne porta ch’aggio tuzzuliato
cercanno: “me vulite a faticà?”
m’hanno chiamato pazzo o scemunuto
dicenneme: Ma vide addò he arrubbà”.
E allora si’ so’ nato cu’ sta sciorta,
pecchè ‘o destino nun m’’a vò cagnà,
senza penzarce faccio palla corta
sfidanno ‘a legge e pure ‘a società.
Io arrobbo, trase e jesco, pe’ tramente
‘o tiempo ‘e chesta vita adda passà
‘o riesto, tutt’’o riesto, ‘e ccosa ‘e niente
tanto nisciuno cchiù me po’ salvà.
E si po’ doppo…’Ncielo pure Ddio
decidarrà che m’adda cundannà,
che me ne ‘mporta, saccio ‘o fatto mio,
faccio ‘o mariuolo pe’ ll’eternità!
Stu juorno nuovo
Ca ce sceta
Tene ‘o sorriso ‘e gioia
Che da’ speranza
Pe’ ll’aria tutt’attuorno
Nu prufumo d’alleria
‘o canto ‘e nu canario
ca vola verso ‘o cielo .
Napule mamma overa
E no matrigna
Dà latte a chistu figlio
Appena nato
‘o cunnulèa
s’’o vase e l’accarezza
po’ guarda l’orizzonte
e ‘ncopp’’o mare
finalmente
vede nu raggio ‘e sole
preputente .
Teneva sempe quatto pezze ‘ncuollo;
vedènnolo faceva assaje pietà;
e ghieva murmulianno pe’ Tuledo:
“Faciteme, ve preco, ‘a carità!”
Quanno qualcuno ‘o deve vinte lire,
‘o scemo ne redeva, ringrazianno:
“ ‘Ite ‘a campà cient’anne, bona gente;
cient’anne, ‘a fore ‘e chiste, e cu’ salute”.
E quacche vota, v’’o ccunfesso i’ pure,
vedènnolo accussi maleridotto,
lle devo diece lire o ‘a sicaretta,
penzanno: “Accussi giovane… che pena!”.
Ma nu juorno passanno p’’a Riviera
cu’ ‘a ‘nnammurata mia, a core a core,
vedetto asci ‘a na machina straniera,
chistu scemo vestito ‘a gran signore…
Teneva appresso a isso na figliola,
che v’aggia dì, na vera grazia ‘e Dio,
cu nu vestito degno ‘e na reggina,
tutta truccata comm’a na gran miss.
Da buon napoletano, io son curioso;
e ‘a ‘nnammurata mia, c’a o canusceva,
è cchiù curiosa ‘e me, e ntuppecànneme,
me dicette: “Lucia’, tu he visto, neh?”.
Allora nun penzannoce doje vote,
m’avvicenaje e lle dicette. “Siente,
scusame si voglio essere ‘ntricante;
ma dimme: nun cercave ‘a carità?!”.
Me guardaje stuorto, m’abbuzzaje ‘o surriso,
e rispunnette cu nu filo ‘e voce:
“Te preco, statte zitto, mo te spieco:
muglierema nun sape ‘a verità”.
“Scerì, si tu permette nu minuto,
i’ vaco cu’ ‘st’amico aret’’o vico;
ll’aggia fa ‘na ‘mmasciata…”. E ‘a figliulella
‘o surridette, e lle dicette: “Oui”.
Appena c’avutaimo ‘o vecariello,
ce fermaimo, e isso me guardaje:
“I’ nun saccio chi si’, però me saje,
e mo te voglio ‘a storia mia cuntà.
Crisciuto senza mamma e senza pate,
arrubbavo na mela pe’ magnà;
d’’e puortice canosco tutt’’e pprete;
e saccio pur’’e mezze pe’’mbruglià.
Nu juorno, dint’a ‘stu cerviello fino,
me venette ll’idea ‘e fa ll’attore:
‘o meglio palcuscenico era ‘a via!
E accussì cumminciaje a recità.
Facenno ‘o scemo ‘a gente, divertita,
se fermava, redeva e regalava…
Dimme na cosa: tu ch’avisse fatto?
Ve piace ‘o scemo? E i’ ‘o scemo voglio fa.
Ma ‘o munno gira comme gira ‘a rota.
Nu bello juorno jette pe’ cuntà
e me truvaje nu bello capitale!
E fuie ‘o mumento chilo ‘e me fermà.
Me cercaje na figliola, e tu ll’hè vista:
na francesella chiena ‘e qualità.
Me so’ spusato e mo campo contento,
tenenno pure quacche proprietà.
Nun ce sta niente ‘a fa, cumpare mio:
‘a gente nun lle piace ll’ommo onesto;
pirciò ll’unica cosa, e tu ll’hè visto,
è chello ‘e truvà ‘o mezzo pe’ fa fesso!…”.