'O Janco

Uve: Janca Tenera, Pepella e Ienestra

Io songo 'o janco 'e Tramunte: nisciuno maje m'ha penzato. Tutte parlano d''o tintore e d''o piere 'e palummo. 'O meglio cuntadino primma 'o metteva dint'â votte d''o niro. Eppure io songo l'anema d''o paese, ca quanno mena 'o viento 'e terra 'e ccape 'e vite 'e mmena nterra; quanno è viento 'e mare; l'acqua e 'o sole ammosciano 'e ppigne d'uva e pe chhesto me chiammano "Janca Tenera". Ma chello ca me piace songo 'e juorne cavere e 'e nnotte fresche eppure a me m'hann''a cogliere tarde. Ottobre è 'o meglio mese pe sta ancora appiso nzieme 'a peppella e a ienestra.

Stu vino è accussì frisco ca pô stà astipato pure pe anne senza se scagnà.

'O Rosato

Vuje penzate ca so' nnuovo, mmece 'o cuntadino m'ha sempe fatto, e me chiamma "vino 'e surrentino". Isso metteva a ll'uva scamazzata cu 'e piede 'int'â suppressa e 'o succo ca asceva subito 'int'â votte. 'O mosto a S. Martino era ggià vino e pe Nnatale 'a votte già era vacante, pecché vicino 'o ffuoco 'int'ô fuculare o dint'â muntaggna stu vino scenneva na bellezza e s''o bevevano pure 'e ffemmene e 'e ccriature e 'o core s'allegriava.

'O Russo

Chisto è 'o vino 'e Tramunte, fatto 'e tintore e nu poco 'e pere 'e palummo.

Quaccheruna d''e vite viecchie so' ggruosse comme ê ceppe 'e castaggno. 'A Terra è chiena 'e lapille d''o Vesuvio: 'o quarantaquatto, ô tiempo d''a libberazzione d''o fascismo, quanno 'o Vesuvio se scetaie, cennere e lapille se pusajeno pure ncopp' a tutte ll'asteche d''o paese nuosto. Accussì dice sempe 'a mamma mia ca mo tene nuvanta anne. Chisto è uno d''e segrete ca fa campà sti vvite accusì a luongo, â faccia d''a filossera e 'e tante ati avverzetà.