Lacreme napulitane

Mia cara madre,
sta pe’ trasí Natale,
e a stá luntano cchiù mme sape amaro....
Comme vurría allummá duje o tre biangale...
comme vurría sentí nu zampugnaro!...

A ’e ninne mieje facitele ’o presebbio
e a tavula mettite ’o piatto mio...
facite, quann’è ’a sera d’’a Vigilia,
comme si ’mmiez ’a vuje stesse pur’io...

E ’nce ne costa lacreme st’America
a nuje Napulitane!...
Pe’ nuje ca ce chiagnimmo ’o cielo ’e Napule,
comm'è amaro stu ppane!

Mia cara madre,
che so’, che so’ ’e denare?
Pe’ chi se chiagne ’a Patria, nun so’ niente!
Mo tengo quacche dollaro, e mme pare
ca nun so’ stato maje tanto pezzente!

Mme sonno tutt’ ’e nnotte ’a casa mia
e d’ ’e ccriature meje ne sento ’a voce...
ma a vuje ve sonno comm’a na "Maria"...
cu ’e spade ’mpietto, ’nnanz’ ’o figlio ’ncroce!

E nce ne costa lacreme st’America
e nuie napulitane…
Pe’ nuie ca nce chiagnimmo ’o cielo ’e Napule
Comm’ è amaro stu ppane!

Mm’avite scritto
ch’Assuntulella chiamma
chi ll’ha lassata e sta luntana ancora...
Che v’aggia dí? Si ’e figlie vònno ’a mamma,
facítela turná chella “signora”.

Io no, nun torno...mme ne resto fore
e resto a faticá pe’ tuttuquante.
I’, ch’aggio perzo patria, casa e onore,
i’ so’ carne ’e maciello: So’ emigrante!

E nce ne costa lacreme st’America
e nuie napulitane…
Pe’ nuie ca nce chiagnimmo ’o cielo ’e Napule
Comm’è amaro stu ppane!