Il Napoli - Puisie int'â lengua napulitana

L’Inter se l’ha pigliato, stu scudetto,
pur facenno nu cuofano ‘e str…ate.
Pe l’occasione ca s’anno magnate
s’anna dà, e romaniste, ‘e ponie ‘mpietto.
Mò se dice: vittoria ammeretata,
ma l’interiste, ca so propio pazzi
(nun vulimme fa nomme: Materazzi),
se so’ ridotte all’urdema jurnata.

‘O tiempo d’a campagna elettorale
“Vi tolgo l’immondizia!”, Berlusconi
dicette. Ma cà stammo tale e quale,
anzi peggio: aggiungette i suoi “campioni”.
Ched’è, vulive conquistà l’Europa?
Se se. Milàn, tu mò hai toccato il fondo:
può vencere a tressette, oppure a scopa.
Sì campione? Gnorsì: ma dell’immondo.

Ncopp’o carro d’a salvezza
è sagliuto (quasi) ‘o Toro.
Uno-doje: tre punti d’oro.
Nuje jucammo na schifezza:
‘o chiù meglio è stu Navarro,
fin’a mò int’a naftalina.
Tutt’o riesto è na latrina
(lle pigliasse nu catarro!)

Ma qua parola po’ rimà cu “pena”?
Si, p’a truvà, pigliate nu rimario
v’accurgite ‘e nu fatto straordinario:
è “Napoli”, leggite: nunn’è “Siena”.
A centrocampo, là, senza Gargano,
e Blasi, simme fiacche, inconcludente:
chillu Pazienza nun cumbina niente,
se trascina p’o campo, chianu chiano.

Rigore al Parma, e ghiamme in confusione,
robba a ce fa venì nu male ‘e core.
Lucarelli nun perde l’occasione,
e stu Napule è tutto nu tremmore.
Cu sti capille curte e brizzolate,
entrambe allerta, l’uocchie comm’a spille,
Cuper e Reja pareno doje frate.
P’alluccà, se cunzuman’e tunzille.

Co’ Del Neri, Belleri e Carrozzieri
eccoqua: n’ata vota annanz’e piere.
Mò v’aggiustammo nuje, molle ’e vrachiere!
‘O cinc’a uno abbrucia comm’aiere.
Nuje: Contini, Mannini, e il buon Savini.
Tanno facettemo na brutta fine,
e ’o pigliajemo overo aret’e rine.
‘I c’arravugliamiento de stentine!

‘E partite se ponno pure perde:
ma nun vulimmo fa figure ‘e  m….
Chest’anno già n’avimme fatte tante:
Samp, Atalanta e cumpagnia cantante.
Figlie ‘e nu ciuccio, a forza simme ciucci:
c’avimme fatte fottere ‘a Colucci
ca mmiez’a tanti cosce, ‘a trova a senga,
e fa felice ‘o mister, Walter Zenga.

AMAURI’
(da canticchiare sul motivo di “Oi Marì”, di Russo-Di Capua)
Amaurì, Amaurì,
che paura tenevem’e te,
facce vedè,
ca Lavezzi è cchiù meglio di te….
Amaurì, Amaurì,
si stu tiro ‘o facive trasì,
eva murì,
Amaurì, Amaurì…

A Reggio ‘o “Pocho” l’amma chiammà “Poco”:
contr’e viola fuje tutta n’ata cosa.
C’o cumpagniello sujo, Roberto Sosa,
‘a fatto assaje casino, e poco joco.
Ma al finale, comm’è, comme nunn’è,
arriv’o gol: doje vote tir’ o Pampa,
e Campagnolo care, nunn’a scampa.
Napule, stregne ‘e diente: attent’a te!

‘A frase ‘e De Filippo s’è cagnata.
Al San Paolo adda venì, a nuttata:
ca tutt’e squadre ca ‘ncuntrammo ‘e notte
se ne so ghiute ‘a ccà cu ll’osse rotte.
E’ scuro, sì, ma ncopp’o campo è chiaro:
da dietro a tutti lancia  Cannavaro
a Superman. A chi? Supermannini:
e ‘o gol, p’o  Pocho, è un gioco da bambini.